Tramp sobiq prezident Barak Obamani firibgarlikda aybladi
Uning fikricha, Obama va u bilan birga harakat qilgan shaxslar saylovdagi qonunbuzarliklar uchun javobgarlikka tortilishi kerak.
AQSh prezidenti Donald Tramp 2025-yil iyul oyida “Truth Social” platformasida e’lon qilgan bayonotida 2016-yilgi prezidentlik saylovlari yuzasidan sobiq prezident Barak Obamani firibgarlikda aybladi. Trampning ta’kidlashicha, o‘sha vaqtdagi Demokratlar partiyasi a’zolari, jumladan Obama boshchiligidagi siyosiy guruhlar, saylov natijalariga noqonuniy ta’sir ko‘rsatishga uringan.
Ushbu chiqishida Tramp Fox News telekanali jurnalisti Xarrison Filds va Milliy razvedka direktori Tulsi Gabbardning 2016-yilgi saylovlar yuzasidan fosh etilgan faktlarga asoslangan bayonotlarini maqtov bilan tilga oldi.
“Obama va uning “gangsterlar jamoasi” saylovdagi firibgarlik uchun eng yuqori darajada jinoiy javobgarlikka tortilishi kerak”, — deb yozdi Tramp o‘z postida.
Shuningdek, Tramp Tulsi Gabbardning Obama ma’muriyati davrida AQSh razvedka xizmatlari siyosiy maqsadlarda Tramp prezidentligiga to‘siq bo‘lish uchun noto‘g‘ri ishlatilgani haqidagi bayonotini ijobiy baholab, uni ochiqchasiga tabrikladi.
Ma’lumot o‘rnida, Donald Tramp 2016-yilgi saylovlarda Respublikachilar partiyasi nomzodi sifatida ishtirok etib, demokrat nomzod Hillari Klinton ustidan g‘alaba qozongan edi. Tramp va uning tarafdorlari bu saylovlar davomida noto‘g‘ri axborotlar, razvedka manipulyatsiyasi va ommaviy axborot vositalari orqali bosim bo‘lgani haqida bir necha bor bayonot bergan.
