Zo‘ravonlik xavfi aniqlansa, bola vaqtincha oiladan ajratilishi mumkin - yangi tartibni joriy etildi
Tartib “Inson” markazlari va huquq-tartibot organlari orqali amalga oshiriladi.
O‘zbekiston Respublikasi hukumatining qaroriga muvofiq, bolalarga nisbatan zo‘ravonlik xavfini aniqlash, baholash va unga qarshi chora ko‘rish bo‘yicha huquqiy mexanizmlarni belgilovchi yangi nizom tasdiqlandi. Endilikda bola xavf ostida deb topilsa, zarur hollarda u vaqtincha oiladan ajratilishi mumkin.
Yangi tartibga ko‘ra, bola zo‘ravonlik qurboni bo‘lishi yoki shunday xavf mavjud bo‘lishi aniqlansa, bu haqda o‘zi yoki qonuniy vakili orqali “Inson” ijtimoiy xizmatlar markazlariga, ichki ishlar organlariga yoki boshqa vakolatli idoralarga murojaat qilishi mumkin.
Mazkur murojaat asosida “Inson” markazi ichki ishlar xodimlari ishtirokida bolaning hayotiy holatini bir kun ichida o‘rganadi va xavf darajasini dastlabki tahlildan o‘tkazadi. Agar xavf “yuqori” deb baholansa, quyidagi choralar ko‘riladi:
zo‘ravonlik sodir etgan shaxsga nisbatan protsessual majburlov choralarini qo‘llash;
bola yoki uning vakiliga himoya orderi berish;
bolaning xavfsizligini ta’minlash maqsadida uni vaqtincha oiladan ajratish.
Bola hayotiga tahdid soluvchi omillar bartaraf etilgach, “Inson” markazi 14 kun ichida bola holatini kompleks baholaydi va natijalar asosida 3 ish kuni davomida maxsus himoya rejasi ishlab chiqiladi.
Shuningdek, zo‘ravonlik sodir etgan yoki shunga moyillik bildirgan shaxslarga nisbatan quyidagicha huquqiy choralar qo‘llanishi mumkin:
majburiy tuzatish dasturlaridan o‘tkazish;
ota-onalik huquqini vaqtincha cheklash yoki bekor qilish;
narkologik muassasalarda majburiy davolanish;
boshqa majburiy tibbiy choralarni qo‘llash.
