Ixtiyoriymi yoki majburiy? Andijonda o‘qituvchilar maktabdagi taʼmirlash ishlariga jalb qilinganiga ikki xil munosabat bildirildi
Maktabgacha va maktab taʼlimi boshqarmasi o‘qituvchilar ixtiyoriy ravishda “hashar” tashkillashtirganini aytdi, Bandlik vazirligi esa pedagoglar bu ishga majburlangan demoqda.
Avvalroq Andijon viloyatining Marhamat tumanidagi 42-umumtaʼlim maktabida o‘qituvchilar taʼmirlash ishlariga jalb qilingani va bu bo‘yicha o‘rganish boshlangani xabar qilingandi.
Viloyat Maktabgacha va maktab taʼlimi boshqarmasining maʼlum qilishicha, Marhamat tumani “Yangi hayot” MFY o‘ramida joylashgan 42-umumtaʼlim maktabi 1982 yilda qurilib, 2005 yilda joriy taʼmirlangan. Maktab 2023 yil “Tashabbusli byudjet” loyihasi asosida 1 milliard 200 millionlik qiymatga ega eshik va romlar bilan taʼmirlangan. 2024 yilgi mavsumda 1 milliard 300 million so‘m mablag‘lar yutib olinib, sport maydoni qurilgan va maktabning old qismi zamonaviy ko‘rinishga keltirilgan.
Hozirda maktabda jami 1 ming 236 nafar o‘quvchilarga 74 nafar ustozlar taʼlim beradi.
“Ijtimoiy tarmoqlarda muhokamalarga sabab bo‘lgan videotasvirlardagi holat joriy yilning 2 avgust kuni sodir bo‘lib, unda bir guruh pedagoglar tomonidan hashar jarayonlari amalga oshirilayotganligi aks etgan.
Maktab jamoasi bilan suhbatda ular tomonidan ushbu hashar ixtiyoriy ravishda amalga oshirilgani taʼkidlansa-da, ustozlarni o‘z lavozim majburiyatidan tashqari ishlarni bajarish holatini nazoratga olmaganligi sababli maktab direktori Z.M. egallab turgan lavozimidan ozod etilganligini maʼlum qilamiz”, deyiladi rasmiy munosabatda.
Oradan biroz vaqt o‘tib, Kambag‘allikni qisqartirish va bandlik vazirligi ham shu holatga rasmiy munosabat bildirib, maktab direktoriga nisbatan jarima jazosi tayinlanganini maʼlum qildi.
Qayd etilishicha, Marhamat tumanidagi 42-maktab o‘qituvchilari taʼmirlash ishlariga majburiy jalb qilingani holati bo‘yicha Kambag‘allikni qisqartirish va bandlik vazirligi Davlat mehnat inspeksiyasi tomonidan joriy yil 4 avgust kuni o‘rganish o‘tkazilgan va holat tasdiqlangan.
Maktab direktori Z.Mamajonovaga Maʼmuriy javobgarlik to‘g‘risidagi kodeksning 51-moddasi 2-qismiga asosan bazaviy hisoblash miqdorining 100 baravari miqdorida jarima qo‘llanilgan.
Hozirga qadar Maktabgacha va maktab taʼlimi vazirligi tomonidan hech qanday munosabat bildirilmagan. Holat esa ijtimoiy tarmoqda muhokamalar markazida bo‘lib turibdi.
“Marhamatdagi 42-maktabga taʼmirlash uchun mablag‘ ajratilganmidi? Qancha ajratilgandi? Nega maktab oxirgi 2 yilda faqat Tashabbusli byudjetga elanib eshigini, romini, fasadini va boshqa kamini tuzatadi? Yangi vazir bu holatni o‘z ko‘zi bilan borib ko‘rdimi? Yoki viloyatdagi xodimlarning gapi bilan kifoya qildimi?”, deya post yozib qoldirgan Otabek Bakirov o‘z sahifasida.
“Agar o‘qituvchilar bilan “ixtiyoriy-majburiy hashar” qilmaganida o‘sha direktor baribir ishdan bo‘shatilardi. Nima uchun deysizmi? Maktabi yangi o‘quv yiliga tayyormasligi, remont qilinmagani uchun.
Bu yo‘l faqat o‘lim yo‘li, tirik qolish omadga bog‘liq xolos. Video tarqalmaganda, tirik qolardi. Chunki videosi tarqalmagan, lekin hokim pul ajratmagani uchun o‘qituvchilarning o‘zi ishlayotgan maktablar juda ko‘p...”, deb yozadi Xushnudbek Xudoyberdiyev.
