Tramp Eron bilan savdo qiluvchi davlatlarga 25 foiz boj joriy etdi
Eronning asosiy savdo hamkorlari qatoriga Hindiston, Xitoy va Turkiya kiradi.
Donald Tramp Eron bilan savdo aloqalarini davom ettirayotgan barcha davlatlarga nisbatan qat’iy savdo choralarini e’lon qildi. Unga ko‘ra, Eron bilan biznes yuritayotgan har qanday mamlakat Qo‘shma Shtatlar bilan amalga oshiriladigan barcha savdo operatsiyalarida 25 foizlik tarif to‘lashga majbur bo‘ladi.
Prezident bu haqda TruthSocial ijtimoiy tarmog‘idagi sahifasida ma’lum qildi. Uning ta’kidlashicha, mazkur qaror darhol kuchga kiradi hamda u bo‘yicha hech qanday istisnolar yoki apellyatsiya mexanizmlari nazarda tutilmagan.
Bloomberg agentligi ma’lumotiga ko‘ra, Eronning asosiy savdo hamkorlari qatoriga Hindiston, Xitoy va Turkiya kiradi. Mazkur davlatlar yangi tariflar tufayli AQSh bilan savdo munosabatlarida sezilarli iqtisodiy bosimga duch kelishi mumkin.
Yangi savdo choralariga keskin siyosiy ritorika hamrohlik qilmoqda. Avvalroq Donald Tramp Oq uy va AQSh harbiy doiralari Erondagi norozilik namoyishchilarini qo‘llab-quvvatlash bo‘yicha turli ssenariylarni tahlil qilayotganini bildirgan edi. U, shuningdek, Eron muxolifati vakillari bilan aloqada ekanini ham ta’kidlagan.
Prezident matbuot kotibi Kerolin Livittning ma’lum qilishicha, Tramp ma’muriyati Erondagi norozilik namoyishlarining zo‘ravonlik bilan bostirilishi fonida barcha ehtimoliy choralarni ko‘rib chiqmoqda. Shu bilan birga, u diplomatiya AQSh prezidentining ustuvor va birinchi tanlovi bo‘lib qolayotganini qayd etdi.
