O‘zbekistonda dorixonalarda spirt o‘rniga losyon taklif qilinmoqda

 

Fuqarolardan ayrim dorixonalar faoliyatiga oid shikoyatlar kelib tushgani munosabati bilan Raqobat qo‘mitasi tomonidan “Sirli mijoz” tadbiri o‘tkazildi. Murojaatlarda dorixonalarda tibbiy spirt so‘ralganda, xodimlar tomonidan uning o‘rniga losyon taklif etilayotgani qayd etilgan. Bu haqda Raqobat qo'mitasi matbuot xizmati xabar berdi.

 

O‘rganishlar doirasida 20 dan ortiq dorixona qamrab olindi. Natijada, ularning taxminan 25 foizida xaridor spirt so‘raganida losyon berilgan holatlar aniqlangan.

 

Maʼlum qilinishicha, dori vositalarini ishlab chiqarishda GDP sertifikatlari joriy etilib, sifat nazorati kuchaytirilgan davrda ayrim ishlab chiqaruvchilar spirt uchun litsenziya olmagan holda, uning o‘rniga losyon ishlab chiqarishga o‘tgan. Bunda isteʼmolchilarga yetarli va aniq axborot berilmagani ularni chalg‘itish holatlariga sabab bo‘lgan.

 

70 foizlik tibbiy spirt sog‘liqni saqlash amaliyotida, jumladan:

• inyeksiya oldidan terini dezinfeksiya qilishda;
• tibbiy asbob-uskunalarni sterilizatsiya qilishda;
• jarohatlarni davolashda;
• jarrohlik amaliyotlarida keng qo‘llaniladi.

 

Losyon esa tarkibida spirt miqdori past bo‘lgan kosmetik mahsulot bo‘lib, asosan terini tozalash, ortiqcha yog‘lanishni kamaytirish va kosmetika qoldiqlarini ketkazish uchun mo‘ljallangan.

 

Mutaxassislar taʼkidlashicha, tibbiy spirt o‘rniga losyon qo‘llanishi kutilgan samara bermasligi, ayrim holatlarda esa isteʼmolchilar sog‘lig‘iga zarar yetkazishi mumkin.

 

Mazkur holatlar isteʼmolchilarga noto‘g‘ri axborot taqdim etilishi sifatida baholanib, Raqobat qo‘mitasi tomonidan dorixonalarga nisbatan qonunchilikda belgilangan tartibda choralar ko‘rish masalasi ko‘rib chiqilmoqda. Shuningdek, bunday holatlarning oldini olish yuzasidan Farmatsevtika mahsulotlari xavfsizligi markaziga tegishli xat yuborilgan.