Farg‘ona vodiysida kuchli qor yog‘ishi sabab bir nechta aviareyslar muqobil aerodromlarga yo‘naltirildi
Namangan yo‘nalishidagi ayrim reyslar Toshkent, Samarqand va O‘sh aeroportlariga qo‘ndirildi.
Farg‘ona vodiysida kuzatilgan kuchli qor yog‘ishi sababli bir nechta aviareyslar muqobil aerodromlarga yo‘naltirildi, deya xabar bermoqda “O‘zbekiston aeroportlari” AJ matbuot xizmati.
Ma’lum qilinishicha, noqulay ob-havo sharoiti tufayli ayrim reyslar ekipajlari xavfsizlik choralarini inobatga olib, zaxira aerodromlarga qo‘nish haqida qaror qabul qilgan.
Xususan:
- Irkutsk – Andijon yo‘nalishidagi S7 Airlines aviakompaniyasining S76311 reysi O‘sh shahridagi muqobil aerodromga yo‘naltirilib, mahalliy vaqt bilan 00:01 da qo‘ngan;
- Jidda – Namangan yo‘nalishidagi Air Samarkand aviakompaniyasining 9S5010 reysi Samarqand aeroportiga, 00:27 da qo‘ngan;
- Yekaterinburg – Namangan yo‘nalishidagi Ural Airlines aviakompaniyasining U62963 reysi Samarqanddagi muqobil aerodromga, 00:40 da qo‘ngan;
- Samara – Namangan yo‘nalishidagi “O‘zbekiston havo yo‘llari”ning HY9806 reysi Toshkent aeroportiga, 04:11 da qo‘ngan;
- Medina – Namangan yo‘nalishidagi FlyOne Asia aviakompaniyasining 7Q4452 reysi Toshkentdagi muqobil aerodromga, 06:05 da qo‘ngan.
Ayni paytda Namangan xalqaro aeroporti odatiy ish rejimida faoliyat yuritmoqda.
