Rossiyaning O‘zbekistonga gaz eksporti 30 foizga oshdi
Rossiya “Sibir kuchi” gaz quvuri orqali Xitoyga 39 mlrd kubometr, O‘zbekistonga esa 7 mlrd kubometrdan ortiq gaz eksport qildi.
Xalqaro energetika agentligi (XEA)ning gaz bozori bo‘yicha hisobotiga ko‘ra, Rossiya 2025-yilda quvur orqali tabiiy gaz eksportini oshdi. Xususan, Xitoyga yetkazib beriladigan gaz hajmi 25 foizga, O‘zbekistonga esa 30 foizga ko‘paydi. Bu haqda TASS xabar berdi.
Hisobotda qayd etilishicha, Rossiyaning Xitoyga “Sibir kuchi” gaz quvuri orqali eksporti qariyb 8 milliard kubometrga oshib, 2025-yilda 39 milliard kubometrga yetgan. Shuningdek, “Markaziy Osiyo – Markaz” gaz quvuri tizimi orqali Qozog‘iston hududi orqali O‘zbekistonga yetkazib beriladigan gaz hajmi 30 foizga ko‘payib, 7 milliard kubometrdan oshgan.
Avvalroq “Gazprom” 2025-yilda birinchi marta Xitoyga Yevropaga nisbatan ko‘proq gaz yetkazib berganini ma’lum qilgan edi. Kompaniya ma’lumotiga ko‘ra, Xitoyga 38,8 milliard kubometr gaz eksport qilingan. Bundan tashqari, Rossiya Qozog‘iston, O‘zbekiston va Qirg‘izistonga gaz yetkazib berishni 22,2 foizga, Gruziyaga esa 40,4 foizga oshirgan.
Ma’lumot uchun, “Sibir kuchi” Rossiyaning sharqidagi eng yirik gaz transport tizimi bo‘lib, uning yillik eksport quvvati 38 milliard kubometrni tashkil etadi. Ushbu quvur orqali Xitoyga gaz yetkazib berish 2019-yil dekabr oyida “Gazprom” va CNPC o‘rtasida 2014-yilda imzolangan 30 yillik shartnoma asosida boshlangan. Shartnoma doirasida umumiy yetkazib berish hajmi 1 trillion kubometrdan oshishi, qiymati esa qariyb 400 milliard dollarga yetishi kutilmoqda.
