“O‘zbek–qirg‘iz” davlat chegarasini buzib, noqonuniy dori olib kirgan shaxs qo‘lga olindi
Dorilarning umumiy qiymati 1 milliard 320 million so‘mni tashkil etadi.
Davlat xavfsizlik xizmati Chegara qo‘shinlari hamda Ichki ishlar organlari hamkorligida giyohvandlik vositalari, psixotrop moddalar va kuchli ta’sir qiluvchi dori vositalarining noqonuniy aylanmasiga qarshi qaratilgan tezkor tadbir o‘tkazildi. Bu haqda DXX Zamon.uzga xabar berdi.
Tadbir davomida “o‘zbek–qirg‘iz” davlat chegarasining Farg‘ona viloyati Rishton tumani hududidad o‘tuvchi qismini buzib, qo‘shni davlatdan kirib kelgan Uchko‘prik tumanida yashovchi, 1983-yilda tug‘ilgan shaxs qo‘lga olindi.
Xolislar ishtirokida o‘tkazilgan tekshiruvda ushbu shaxsning yonidan umumiy qiymati 1 milliard 320 million so‘mni tashkil etuvchi 9 542 dona “Zardeks” nomli kuchli ta’sir qiluvchi dori vositalari aniqlanib, belgilangan tartibda rasmiylashtirilib olindi.
Ma’lum qilinishicha, “Zardeks” dori vositasi tarkibida mavjud bo‘lgan “Pregabalin” moddasi O‘zbekiston Respublikasi Vazirlar Mahkamasining 2019-yil 27-sentabrdagi 818-son qaroriga muvofiq, kuchli ta’sir qiluvchi moddalar ro‘yxatiga kiritilgan bo‘lib, uning erkin muomalasi cheklangan.
Hozirda mazkur shaxsga nisbatan Jinoyat kodeksining 223-moddasi 1-qismi, 246-moddasi 1-qismi hamda 251¹-moddasi 3-qismi bilan jinoyat ishi qo‘zg‘atilib, unga nisbatan “qamoq” ehtiyot chorasi qo‘llanilgan.
Hozirda tergov harakatlari olib borilmoqda.
