Prezident Shavkat Mirziyoyev amaliy tashrif bilan AQSHga boradi
Tashrif doirasida davlat rahbari Vashington shahrida boʻlib oʻtadigan Tinchlik kengashining dastlabki yigʻilishida ishtirok etadi.
Prezident Shavkat Mirziyoyev Donald Tramp taklifiga binoan 17–19-fevral kunlari Amerika Qoʻshma Shtatlariga amaliy tashrif bilan boradi. Tashrif doirasida davlat rahbari Vashington shahrida boʻlib oʻtadigan Tinchlik kengashining dastlabki yigʻilishida ishtirok etadi.
Sammit United States Institute of Peaceda oʻtkazilishi rejalashtirilgan boʻlib, unda Gʻazo sektorini tiklash, gumanitar yordam koʻrsatish, mintaqada tinchlik va barqarorlikni taʼminlash masalalari muhokama qilinadi.
Tashrifning ishbilarmonlik dasturi doirasida Oʻzbekiston yetakchisi AQShning yetakchi kompaniyalari va moliya institutlari rahbarlari ishtirokida strategik loyihalar taqdimotida qatnashadi hamda iqtisodiy hamkorlikka oid ikki tomonlama hujjatlarni imzolash marosimida ishtirok etishi ko‘zda tutilgan.
Eslatib oʻtamiz, Tinchlik kengashi AQSh Prezidenti Donald Trampning tashabbusi bilan tashkil etilgan. Oʻzbekiston joriy yil yanvar oyida Shveytsariyaning Davos shahrida unga taʼsischi davlat sifatida qoʻshildi.
