Namanganda bolalarni olib ketayotgan mashina YTHga uchrashi oqibatida bir bola halok bo’ldi
Hodisa kunduzgi parvarish markazi tarbiyalanuvchilarini markazga olib ketayotgan transport vositasida 6 nafar bola bo‘lgan vaqtda yuz bergan.
Joriy yilning 18-fevral kuni soat taxminan 08:30 larda Norin tumanida joylashgan “Umid chirog‘i” kunduzgi parvarish xizmati tarbiyalanuvchilarini markazga olib ketish jarayonida yo‘l-transport hodisasi sodir bo‘ldi. Bu haqda Ijtimoiy himoya agentligi matbuot xizmati xabar berdi.
Dastlabki ma’lumotlarga ko‘ra, hodisa vaqtida transport vositasida 6 nafar tarbiyalanuvchi bo‘lgan. Yo‘l-transport hodisasi oqibatida tarbiyalanuvchilardan biri — 2015-yilda tug‘ilgan Sh.X. og‘ir tan jarohatlari sabab vafot etgan.
Qolgan 5 nafar bolaga Norin tuman tibbiyot birlashmasida zarur birinchi tibbiy yordam ko‘rsatilgan. Hozirgi vaqtda ularning umumiy ahvoli shifokorlar tomonidan qoniqarli deb baholanmoqda.
Mazkur holat yuzasidan tegishli huquqni muhofaza qiluvchi organlar tomonidan belgilangan tartibda tekshiruv ishlari olib borilmoqda.
