Qirg‘iziston rasmiylariga xorijiy hisob raqami ochish taqiqlandi
Sadir Japarov imzolagan qonunga ko‘ra, mansabdorlar o‘z daromadlari, xarajatlari va xorijiy aktivlarini deklaratsiya qilishi majburiy etildi.
Qirg‘iziston prezidenti Sadir Japarov tomonidan imzolangan yangi Korrupsiyaga qarshi kurash to‘g‘risidagi qonun davlat amaldorlariga bir qator cheklovlar joriy etadi. Bu haqda 24.kg nashri xabar berdi.
Unga ko‘ra, rasmiy shaxslarga xorijiy banklarda hisob ochish, qarindoshlarining biznesiga yordam berish, filial kompaniyalar bilan bitimlarda ishtirok etish, shaxsiy manfaatlar uchun rasmiy resurslardan foydalanish, sovg‘alar va mukofotlar olish taqiqlangan. Rasmiy esdalik sovg‘alari bundan mustasno.
Davlat idoralariga korrupsiya haqida maʼlumot olish uchun xavfsiz kanallar yaratishi va bunday huquqbuzarliklar haqida xabar bergan shaxslarni himoya qilishi majburiy etib belgilangan.
Hujjatda korrupsiyaga qarshi siyosat tizimli tarzda tartibga solinib, jinoyatlarni oldini olishdan tortib, ularni aniqlash, javobgarlikka tortish va oqibatlarini bartaraf etish mexanizmlari mustahkamlangan. Moliyaviy nazorat talablariga ko‘ra, mansabdor shaxslar o‘z daromadlari, xarajatlari va mol-mulkini, jumladan xorijiy aktivlarni deklaratsiya qilishi shart, soliq organlari esa ularning muvofiqligini tahlil qiladi.
Shuningdek, korrupsiya xavflarini tahlil qilish, normativ-huquqiy hujjatlarni baholash, jinoyatlarni yagona reyestrda qayd etish va jinoiy yo‘l bilan qo‘lga kiritilgan aktivlarni qaytarish bo‘yicha xalqaro hamkorlik mexanizmlari joriy etilgan. Qonun kuchga kirishi bilan Qirg‘iziston hukumatiga olti oy ichida o‘z qoidalarini yangi qonunga muvofiqlashtirish vazifasi yuklatilgan.
