Samarqandda Xorvatiya konsulligi ochilishi mumkin

 

 

Xorvatiya parlamentining Konstitutsiya, reglament va siyosiy tizim qo‘mitasi a’zolaridan iborat delegatsiya Samarqand shahrida bo‘ldi. Tashrif doirasida delegatsiya a’zolari Samarqand shahar hokimi Fazliddin Umarov bilan uchrashuv o‘tkazdi. Bu haqda O'zA xabar berdi.

 

Uchrashuv chog‘ida Samarqand va Xorvatiyaning turizm markazlaridan biri hisoblangan Dubrovnik shaharlari o‘rtasida hamkorlik aloqalarini yo‘lga qo‘yish istiqbollari muhokama qilindi. Tomonlar turizm, transport, farmatsevtika, aloqa hamda axborot texnologiyalari sohalarida hamkorlikni kengaytirish, qo‘shma loyihalarni amalga oshirish masalalari yuzasidan fikr almashdi.

 

Xorvatiyaning O‘zbekistondagi favqulodda va muxtor elchisi Refik Shabanovich tashrif ikki davlat o‘rtasidagi hamkorlikni yangi bosqichga olib chiqishga xizmat qilishini ta’kidladi. Uning qayd etishicha, o‘tkazilgan uchrashuvlar davomida Toshkent shahrida Xorvatiya elchixonasini, Samarqandda esa konsullik ochish masalasi ham muhokama qilingan. Shuningdek, Samarqand va Dubrovnikni birodar shaharlar sifatida bog‘lash tashabbusi ilgari surildi.

 

Ma’lum qilinishicha, turizm bo‘yicha katta tajribaga ega bo‘lgan Dubrovnik shahri yiliga millionlab sayyohlarni qabul qiladi. Ushbu yo‘nalishdagi tajriba almashuvi Samarqand turizm salohiyatini yanada oshirishga xizmat qilishi kutilmoqda.

 

Samarqand shahar hokimi Fazliddin Umarovning ta’kidlashicha, 2030-yilga qadar shaharga tashrif buyuruvchi sayyohlar sonini 10 million nafarga yetkazish maqsad qilingan. Bu borada Dubrovnik bilan hamkorlik infratuzilmani modernizatsiya qilish, xizmat ko‘rsatish sifatini xalqaro standartlarga moslashtirish hamda tarixiy-madaniy merosni global miqyosda targ‘ib etishda muhim ahamiyat kasb etadi.