Vashingtonda Ilhom Aliyevning qo'riqchilari namoyishchilarni kaltakladi

 

AQSh poytaxti Vashington shahrida Ozarbayjon Prezidenti Ilhom Aliyevning tashrifi chog‘ida namoyishchilar va davlat rahbarining xavfsizlik xodimlari o‘rtasida mojaro yuzaga kelgani haqida xabarlar tarqaldi. Hodisa prezident “Tinchlik kengashi” yig‘ilishida ishtirok etish uchun tashrif buyurgan paytda, Pensilvaniya prospektidagi Waldorf Astoria mehmonxonasi yaqinida sodir bo‘lgan.

 

The Washington Post nashrining yozishicha, namoyishchilar Ozarbayjondagi siyosiy mahbuslarni ozod qilish talabi bilan chiqishgan. Ayrim faollar prezident qo‘riqchilari tomonidan jismoniy kuch ishlatilganini da’vo qilib, jarohat olganliklarini ma’lum qilgan. Ularning aytishicha, kamida bir necha kishi turli darajada tan jarohati olgan.

 

Kolumbiya okrugi politsiyasi vakillari mazkur hodisada Ozarbayjon xavfsizlik xodimlari ishtirok etgani haqidagi ma’lumotlarni tasdiqlab, materiallar tekshiruv uchun AQSh Davlat departamentiga taqdim etilganini bildirgan.

 

Shu bilan birga, Ozarbayjon tomoni voqeaga nisbatan boshqacha izoh bergan. Rasmiy manbalarga ko‘ra, prezident korteji mehmonxona hududiga yaqinlashgan vaqtda bir guruh shaxslar qo‘riqlanadigan hududga kirishga uringan hamda transport vositasining harakatiga to‘sqinlik qilishga harakat qilgan. Elchixona bayonotida bu holat jiddiy xavfsizlik tahdidi sifatida baholanib, xavfsizlik xodimlari amaldagi qoidalarga muvofiq choralar ko‘rishga majbur bo‘lgani ta’kidlangan.

 

Diplomatik missiya vakillari barcha harakatlar faqat davlat rahbari xavfsizligini ta’minlash maqsadida amalga oshirilgani hamda mezbon davlat idoralari bilan muvofiqlashtirilgan holda bajarilganini qayd etgan. Shuningdek, Ozarbayjon ommaviy axborot vositalarida hodisa oldindan rejalashtirilgan provokatsiya bo‘lishi mumkinligi haqidagi taxminlar ham ilgari surilgan.

 

AQSh Kongressi a’zosi Frank Pallone esa ijtimoiy tarmoqlarda voqeaga munosabat bildirib, poytaxt ko‘chalarida namoyishchilarga nisbatan kuch ishlatilishi holati yuzasidan tekshiruv o‘tkazilishi zarurligini ta’kidlagan.

 

Hozirda voqea yuzasidan tekshiruv jarayonlari davom etmoqda. Rasmiy idoralar barcha tafsilotlarni aniqlash va hodisaga huquqiy baho berish bo‘yicha ish olib borilayotganini ma’lum qilgan.