Sadir Japarov bosh vazir o‘rinbosari va sog‘liqni saqlash vazirini lavozimidan ozod qildi
Qirg‘iziston hukumatida yana kadrlar o‘zgarishi amalga oshirildi.
Qirg‘iziston prezidenti Sadir Japarov hukumat tarkibida kadrlar o‘zgarishi yuzasidan qaror qabul qildi. Unga ko‘ra, Vazirlar Mahkamasi raisi o‘rinbosari hamda Suv xo‘jaligi, qishloq xo‘jaligi va qayta ishlash sanoati vaziri Baqit Torobayev lavozimidan ozod etildi.
Bu haqda Qirgʻiziston prezidenti matbuot xizmati xabar berdi.
Shuningdek, Qirg‘iziston sog‘liqni saqlash vaziri Kanibek Dosmambetov ham egallab turgan lavozimidan ozod qilindi.
Avvalroq davlat rahbari tomonidan hukumatning yana bir qator a’zolari lavozimidan bo‘shatilgani ma’lum qilingan edi. Xususan: Favqulodda vaziyatlar vaziri Boobek Ajikeyev, Transport va kommunikatsiyalar vaziri Absattar Sirg‘aboyev, Tabiiy resurslar, ekologiya va texnik nazorat vaziri Meder Mashiyev lavozimidan ozod etilgan.
Bundan tashqari, joriy yil 10-fevral kuni Milliy xavfsizlik davlat qo‘mitasi raisi Kamchibek Tashiyev ham lavozimidan bo‘shatilgani haqida xabar berilgan edi.
