Surxondaryoda so‘nggi 9 yilda 5 milliard dollarlik 8 mingdan ortiq loyiha amalga oshirildi

 

Prezident Shavkat Mirziyoyev raisligida Surxondaryo viloyatini kompleks rivojlantirish bo‘yicha yig‘ilish boshlandi. Davlat rahbari viloyatni tabiati go‘zal, ruhi baquvvat va g‘ayrati baland insonlar yurtiga aylantirish ahamiyatini ta’kidlab, Surxondaryoni rivojlantirish Yangi O‘zbekistonning janubiy tayanch ustunini mustahkamlash demakligini qayd etdi.

 

O‘tgan davrda viloyatda 5 milliard dollarlik 8 mingdan ortiq loyiha ishga tushdi. Xitoy, AQSh, Rossiya, Hindiston, Avstriya va boshqa davlatlar bilan 10 milliard dollarlik investitsiya va savdo kelishuvlari amalga oshirildi. So‘nggi to‘qqiz yilda bog‘cha qamrovi 28 foizdan 68 foizga oshdi, 23 ta yangi maktab qurildi va 448 tasi ta’mirlandi, qo‘shimcha 102 ming o‘quvchi o‘rni yaratildi.

 

Bu davrda 688 ta ko‘p qavatli uy qurilib, 32 ming oila yangi yashash joyiga ko‘chib o‘tdi. Termiz, Angor, Jarqo‘rg‘on, Sariosiyo va Boysun tumanlarida “Yangi O‘zbekiston” massivlari tashkil qilindi. Termiz shahri va 10 tuman aholisi uchun ichimlik suv ta’minoti yaxshilanishi “To‘palang ombori suvidan foydalanish” loyihasi orqali ta’minlandi.

 

Yig‘ilishda viloyat hokimi va tuman rahbarlariga 2026-yilda investitsiyalarni 3 milliard dollarga, eksportni 1 milliard dollarga yetkazish vazifalari belgilandi. Kambag‘allikni 2,8 foizga, ishsizlikni 4,5 foizga tushirish va Termiz, Angor, Denov, Jarqo‘rg‘on, Qiziriq va Muzrabotni kambag‘allik va ishsizlikdan xoli hududga aylantirish zarurligi ta’kidlandi.

 

Hudud iqtisodiyotida sanoat ulushi so‘nggi 9 yilda 5 karra o‘sib, 10 foizga yetdi, ammo bu hali yetarli emas. Viloyatda 100 million tonna ko‘mir zaxirasi mavjud bo‘lib, yiliga atigi 1 foizi qazib olinmoqda. Joriy yilda Boysundagi “Sanjar”, Oltinsoydagi “Oqsuv” va kelasi yilda “Fangart” konlarida ko‘mir qazib olish ishlarini boshlash topshirildi.

 

Shuningdek, janubiy Afrikaning “Sosol” kompaniyasi ko‘mirdan polipropilen, polietilen va kauchuk ishlab chiqarishga qiziqish bildirgan. Xitoylik investorlar Sariosiyodagi “Qorakon”, “Jemsonit”, “Chuqur” va “Bayram-1” konlariga 1 milliard dollar kiritishga tayyor. Ushbu zaxiralar elektrotexnika, qurilish materiallari, kimyo, metallurgiya va avtomobilsozlik tarmoqlari uchun xomashyo bazasini ta’minlaydi.

 

Boysundagi “Bezaktop” konida sifati Eron, Turkiya va Italiya bilan raqobatlasha oladigan tabiiy tosh zaxiralari o‘rganilmagan. Geologiya ishlarini boshlash va konlar atrofida sanoat korxonalarini joylashtirish, kamida 200 million dollarlik loyihalarni shakllantirish topshirildi.