Surxondaryoda Prezident bilan uchrashgan o‘quvchiga universitet granti ajratildi

 

Surxondaryoga tashrifi davomida Prezident Shavkat Mirziyoyev Jarqo‘rg‘on tumanidagi “Yangi O‘zbekiston” massivida joylashgan 66-sonli umumiy o‘rta taʼlim maktabida bo‘ldi. Tashrif doirasida davlat rahbari pedagoglar hamda o‘quvchi-yoshlar bilan muloqot o‘tkazib, taʼlim sifati, yaratilayotgan sharoitlar va yoshlarning kelajak rejalari bilan qiziqdi. Bu haqda Oliy taʼlim, fan va innovatsiyalar vazirligi xabar berdi.

 

Uchrashuv davomida Prezident iqtidorli o‘quvchi Feruza Jumagulova bilan suhbatlashdi. Suhbat chog‘ida o‘quvchi kelgusida Termiz davlat universitetida tahsil olish orzusini bildirgan. Davlat rahbari tashabbusi bilan Feruza Jumagulova 2027–2028-o‘quv yilidan boshlab grant asosida mazkur oliy taʼlim muassasasiga qabul qilinishi belgilandi.

 

Mazkur qaror yoshlarni qo‘llab-quvvatlash, ularning intellektual salohiyatini ro‘yobga chiqarish hamda sifatli taʼlim olishlari uchun keng imkoniyatlar yaratish borasidagi izchil siyosatning amaliy ifodasidir.

 

Tadbirda Prezident Administratsiyasi rahbari o‘rinbosari Ilhom Sirojev, Oliy taʼlim, fan va innovatsiyalar vaziri Qo‘ng‘irotboy Sharipov, Maktabgacha va maktab taʼlimi vaziri Eʼzozxon Karimova, Termiz davlat universiteti rektori Abduqodir Toshqulov hamda viloyat mutasaddilari, maktab jamoasi va o‘quvchining oila aʼzolari ishtirok etdi.

 

Tadbir yakunida Feruza Jumagulovaga grant asosida o‘qishga qabul qilinishi to‘g‘risidagi sertifikat tantanali ravishda topshirildi hamda unga kelgusidagi taʼlim yo‘lida muvaffaqiyatlar tilandi.

 

Avvalroq Shavkat Mirziyoyevning Toshkentdagi yoshlar bilan uchrashuvida qo‘shiq kuylagan xorazmlik o‘quvchiga mashina sovg‘a qilgan edi.