FVV xodimiga 30 ming dollar pora taklif qilgan tadbirkor qo‘lga olindi
Favqulodda vaziyatlar vaziri FVV inspektorini tadbirkordan pora olmagani uchun pul mukofoti bilan taqdirladi.
Davlat xavfsizlik xizmatining Zamon.uz ga ma’lum qilishicha, poytaxtda faoliyat yurituvchi tadbirkor o‘zi rahbarlik qiladigan MCHJ tomonidan Yakkasaroy tumanida barpo etilgan, lekin, bir qator kamchiliklari bartaraf etilmagan 12 qavatli turar joy majmuasini foydalanishga qabul qilinishi bo‘yicha “Nazorat.MS.UZ” elektron portali orqali taqdim etadigan arizasini ijobiy hal qilib berishi evaziga Toshkent shahar Favqulodda vaziyatlar bosh boshqarmasi xodimiga 30 ming AQSH dollari miqdorida pora taklif etgan.
Xodim holat bo‘yicha mas’ullarni xabardor qilgan va o‘tkazilgan tezkor tadbirda MCHJ rahbari poytaxt FVBB xodimiga ushbu pul mablag‘ini bergan vaqtida ashyoviy dalillar bilan qo‘lga olingan.
Holat yuzasidan tadbirkorga nisbatan Jinoyat Kodeksining 211-moddasi (pora berish) 3-qismi “a” bandi bilan jinoyat ishi qo‘zg‘atilib, “qamoq” ehtiyot chorasi qo‘llanildi. Hozirda tergov harakatlari olib borilmoqda.
Favqulodda vaziyatlar vazirligi axborot xizmatining ma’lum qilishicha, general-mayor Azizbek Ikromov tadbirkordan pora olmagani uchun FVV inspektorini pul mukofoti bilan taqdirladi.
