Eronda Mojtaba Xomanaiy yangi Oliy rahbar etib saylandi
Ekspertlar kengashi qaroriga ko‘ra, u mamlakatning uchinchi Oliy rahbari sifatida rasman tasdiqlandi.
Eronda mamlakatning yangi Oliy rahbarini saylash jarayoni yakunlandi. Ekspertlar Kengashi qaroriga ko‘ra, marhum rahbarning o‘g‘li Mojtaba Xomanaiy mamlakatning yangi Oliy rahbari etib saylandi.
Bu haqda Reuters agentligi Ekspertlar kengashi bayonotiga tayanib xabar berdi.
Bayonotda aytilishicha, oyatulloh Seyid Mojtaba Husayniy Xomanaiy Islom Respublikasining uchinchi Oliy rahbari sifatida rasman tasdiqlangan.
56 yoshli ruhoniy va siyosiy arbob uzoq yillardan beri Eron siyosiy tizimida muhim shaxs sifatida tanilib kelgan. U, shuningdek, Islom inqilobi qo‘riqchilari korpusi bilan yaqin aloqalari bilan ham tilga olinadi. Eron siyosiy tizimiga ko‘ra, Oliy rahbar davlatdagi eng yuqori lavozim hisoblanadi va u tashqi siyosat, harbiy strategiya hamda mamlakatning asosiy siyosiy qarorlarida yakuniy so‘zga ega.
Nashrlarning yozishicha, yangi rahbarning saylanishi Donald Tramp tomonidan bildirilgan bayonotlar fonida amalga oshirilgan. AQSh prezidenti avvalroq Vashington Eronning yangi rahbarini tanlash jarayonida mamlakat siyosiy yo‘nalishini o‘zgartirishga qaratilgan ta’sir o‘tkazish niyatida ekanini bildirgan edi.
Shuningdek, Isroil rasmiylari ham Eronning yangi rahbari avvalgi qat’iy siyosatni davom ettirsa, u hujumlar uchun qonuniy nishon bo‘lishi mumkinligi haqida ogohlantirgan.
