Janubiy Koreyadagi zavodda baxtsiz hodisa sabab O‘zbekiston fuqarosi halok bo‘ldi
Ishchini yuk ko‘taruvchi texnika urib yuborgani ma’lum qilindi.
Janubiy Koreyaning Seosan shahrida joylashgan metallurgiya zavodlaridan birida sodir bo‘lgan baxtsiz hodisa oqibatida 50 yoshli O‘zbekiston fuqarosi halok bo‘ldi.
Bu haqda Yonhap News Agency mahalliy huquqni muhofaza qiluvchi organlarga tayanib xabar berdi.
Ma’lum qilinishicha, hodisa 8-mart kuni kechqurun yuz bergan. Zavod hududida ishlayotgan ishchini yuk ko‘taruvchi texnika (forklift) urib yuborgan. Jabrlanuvchi zudlik bilan shifoxonaga yetkazilganiga qaramay vafot etgan.
Hozirda politsiya hodisa sabablarini o‘rganmoqda. Dastlabki taxminlarga ko‘ra, forklift haydovchisi korxona hududida harakatlanayotgan paytda ishchini payqamay qolgan bo‘lishi mumkin.
Qayd etilishicha, mazkur po‘lat zavodida besh nafardan ortiq ishchi faoliyat yuritadi. Shu sababli hodisa Janubiy Koreyaning Jiddiy sanoat baxtsiz hodisalari to‘g‘risidagi qonuni doirasida ko‘rib chiqilmoqda.
Mazkur qonun asosida korxonada mehnat xavfsizligi talablariga rioya etilgan-etilmagani hamda korxona rahbariyatining javobgarligi yuzasidan batafsil tekshiruv o‘tkazilishi kutilmoqda.
