Qirg‘izistonda Ramazon hayiti 20-mart kuni nishonlanadi
Qaror Turkiy davlatlar tashkilotiga a’zo mamlakatlar muftiylari fatvosi asosida qabul qilingan.
Qirg‘iziston musulmonlari idorasining ma’lum qilishicha, mamlakatda 2026-yilgi Ramazon hayiti 20-mart, juma kuni nishonlanadi. Bu qaror Turkiy davlatlar tashkiloti (TDT)ga a’zo mamlakatlar muftiylarining fatvo chiqarish bo‘yicha yig‘ilishida qabul qilingan.
Fatvo hay’atiga TDTga a’zo mamlakatlar – Turkiya, Ozarbayjon, Qozog‘iston, Qirg‘iziston, O‘zbekiston, shuningdek, TDT kuzatuvchi davlatlari – Turkmaniston va Vengriya rasmiy musulmon diniy idoralari vakillari kiradi.
Eslatib o‘tamiz, fevral oyida Turkiy davlatlar tashkiloti Musulmon diniy idoralari rahbarlari kengashining Fatvo hay’ati Samarqandda bo‘lib o‘tgan yig‘ilishida 2026-yilda Ramazon oyining birinchi kuni 19-fevral, payshanba kuniga, Ramazon hayiti esa 20-mart, juma kuniga to‘g‘ri kelishi kutilayotganini belgilagandi.
Shuningdek, 2–4-fevral kunlari Samarqand shahrida Turkiy davlatlar tashkiloti mamlakatlari Musulmon diniy idoralari rahbarlari kengashi huzuridagi Fatvo hay’atining maslahat yig‘ilishi bo‘lib o‘tgan. Tadbir O‘zbekiston musulmonlari idorasi rahbarligida tashkil etilgan bo‘lib, unga TDTga a’zo mamlakatlar diniy idoralari vakillari va islom ulamolari ishtirok etgan.
