Turkiyada qulagan raketa Eron bilan bog‘liq emas — Eron TIV
Anqara havo hududi buzilishiga qarshi choralar ko‘rishini ma’lum qildi.
10-mart kuni Turkiya tashqi ishlar vaziri Hakan Fidan Eron tashqi ishlar vaziri Abbos Aroqchi bilan telefon orqali muloqot qildi. Bu haqda TRT Haber nashri xabar berdi.
Ma’lum qilinishicha, suhbat davomida Hakan Fidan Turkiya havo hududining buzilishi qabul qilib bo‘lmas holat ekanini ta’kidlab, Anqara bunday holatlarga qarshi barcha zarur choralarni ko‘rishda davom etishini bildirgan.
Shuningdek, Turkiya TIV rahbari barcha tomonlarni mintaqaviy xavfsizlikka putur yetkazishi va tinch aholi hayotiga xavf tug‘dirishi mumkin bo‘lgan harakatlardan tiyilishga chaqirgan.
Eron tashqi ishlar vaziri Abbos Aroqchi esa Turkiya hududiga yo‘nalgan raketalar Eron bilan bog‘liq emasligini ma’lum qilib, ushbu hodisa yuzasidan keng qamrovli tekshiruv o‘tkazilishini bildirgan.
Avvalroq Turkiya prezidenti Rajab Toyyib Erdo‘g‘an hukumat yig‘ilishidan keyingi chiqishida Eronni vaziyatni keskinlashtirishi mumkin bo‘lgan xatolardan tiyilishga chaqirgan edi.
