“Sergelidagi ko‘prik muammosi ijtimoiy tarmoqlarda tarqalganidan keyin unga yechim berildi” — Prezident

Prezident raisligida o‘tkazilayotgan videoselektor yig‘ilishida fuqarolar murojaatlari bilan ishlashdagi kamchiliklar muhokama qilindi.

 

Ma'lum qilinishicha, Toshkent shahrida 170 ming va Toshkent viloyatida 110 ming murojaatning yarmidan ko‘pi yechimini topmagan. Surxondaryo, Samarqand, Toshkent shahrida takroriy murojaatlar ko‘paygan.

 

Bundan tashqari, yig'ilishda fuqaro yanvar oyida maktab o‘quvchisi Sergelidan oqib o‘tadigan Junariq kanaliga tushib ketganini aytib, murojaat qilganiga to'xtalib o'tildi. Biroq ikki oy davomida mazkur murojaatga birorta mas’ul e’tibor qaratmagasdan, yuzaki javob bergani tanqid qilindi.

 

Holat ijtimoiy tarmoqlarda keng tarqalganidan keyingina ko‘prikni tiklash uchun mablag‘ ajratilib, qurilish ishlari amalga oshirilgani qayd etildi.

 

Shuningdek, bunday holatlar fuqarolar murojaatlari bilan ishlash tizimidagi jiddiy kamchilik sifatida baholanib, murojaatlarga befarq munosabat fuqarolarning davlat idoralariga bo‘lgan ishonchiga salbiy ta’sir ko‘rsatishi ta'kidlandi.