Izmirda o‘zbekistonlik ayol to‘rtinchi qavatdan tushib ketdi
U turk fuqarosiga turmushga chiqqan bo‘lib, hodisa kuyovning uyida sodir bo‘lgan.
Turkiyaning Izmir shahrida o‘zbekistonlik ayol ko‘p qavatli uyning to‘rtinchi qavatidan tushib ketdi. Bu haqda O‘zbekistonning Istanbul shahridagi Bosh konsulxonasi ma’lum qildi.
Dastlabki ma’lumotlarga ko‘ra, Namangan viloyatidan bo‘lgan 22 yoshli fuqaro Sevdora Hakimjonova Izmirda yashab kelayotgan vaqtida hodisaga uchragan. U hozirda davlat shifoxonasida davolanmoqda, shifokorlar uning ahvolini og‘ir deb baholamoqda.
Ma’lumotlarga ko‘ra, ayol Turkiya fuqarosi bilan imom nikohi asosida turmush qurgan, biroq ushbu nikoh rasmiy ravishda ro‘yxatdan o‘tkazilmagan. Nikoh marosimi Chust tumanida o‘tkazilgan. Keyinchalik er-xotin Izmirga ko‘chib o‘tib, kuyovning qarindoshlari bilan birga yashab kelgan.
Qayd etilishicha, turmush o‘rtog‘i ham marhuma kabi eshitish va nutqida nuqsoni bo‘lgan shaxs hisoblanadi.
Mazkur hodisa yuzasidan Turkiya huquqni muhofaza qiluvchi organlari tomonidan jinoyat ishi qo‘zg‘atilib, voqea tafsilotlarini aniqlash bo‘yicha tergov harakatlari olib borilmoqda. To‘plangan materiallar prokuratura tomonidan ko‘rib chiqiladi.
Bosh konsulxona vaziyat nazoratga olinganini bildirib, jabrlanuvchining sog‘lig‘i hamda tergov jarayonlari yuzasidan Turkiya vakolatli idoralari bilan hamkorlik davom etayotganini ma’lum qildi.
