Toshkent va Nurafshon o‘rtasida BRT avtobus yo‘lagi quriladi
BRT tizimi 2028-yil oxiriga qadar ishga tushiriladi.
Toshkent va Nurafshon shaharlari o‘rtasida tezyurar avtobuslar (BRT) tizimi ishga tushiriladi. Xalq deputatlari Toshkent viloyati Kengashi mazkur yo‘nalishda BRT tizimini joriy etish loyiha konsepsiyasini tasdiqladi.
Loyihaning umumiy qiymati taxminan 120 mln AQSH dollarini tashkil etadi.
Qarorda qayd etilishicha, poytaxt bilan viloyat markazini bog‘laydigan mavjud transport infratuzilmasi hozirgi yuklamalarga mos kelmaydi. Hozirda yo‘nalishda transport oqimining 92−94 foizi shaxsiy avtomobillar hissasiga to‘g‘ri keladi, jamoat transporti esa 1 foizdan ham kam. Bu esa yo‘l o‘tkazuvchanligini pasaytiradi va tirbandliklarga sabab bo‘ladi.
Loyiha doirasida mavjud 4 tasmali yo‘l xalqaro standartlarga mos Ib-toifali shahar magistrali darajasiga ko‘tariladi va intellektual boshqaruv tizimi joriy etiladi. Yo‘lning Toshkent qismida 12−16 ta harakatlanish yo‘lagi, shahar atrofida 8 ta va Nurafshonda 10 ta yo‘lak rejalashtirilgan.
Alohida yo‘lning uzunligi 23 kmni tashkil etadi, loyihaviy tezlik esa 80−100 km/soat (aholi punktlarida 60 km/soatgacha) bo‘ladi.
BRT tizimi ishga tushgandan so‘ng Toshkent va Nurafshon o‘rtasida qatnov vaqti 2 baravar qisqaradi va 150 mingdan ortiq aholining yo‘ldan kundalik harakatlanish imkoni bo‘ladi.
Dastlabki hisob-kitoblarga ko‘ra, loyihaning qiymati quyidagicha taqsimlangan:
Yo‘l ishlari (asfalt-beton qoplamasi) — 61,578 min dollar;
Ko‘priklar va suv quvurlari — 5,266 min dollar;
BRT stansiyalari (9 ta) — 16,331 min dollar;
Muhandislik tarmoqlari — 8,035 min dollar;
Yoritish tizimi — 6,899 min dollar;
Intelligent transport system (ITS) — 13,354 min dollar;
Ko‘kalamzorlashtirish — 2,483 min dollar;
Ko‘zda tutilmagan xarajatlar — 5,697 min dollar;
Tizimning 2028-yil oxiriga qadar ishga tushirilishi va poytaxt bilan viloyat markazini zamonaviy tezyurar transport qatnovi bilan bog‘lashi rejalashtirilgan.
