“Bu biz tuzgan bitim emas”: Tramp Eronni sulhni buzganlikda aybladi
AQSh yetakchisi Eron Hormuz bo‘g‘ozida kemalar harakatini cheklayotganini tanqid qildi.
AQSH prezidenti Donald Tramp Eronni Hormuz bo‘g‘ozi orqali kemalar harakatini cheklashda aybladi va mavjud kelishuv shartlari buzilayotganini ma’lum qildi.
Uning ta’kidlashicha, Eron sulh majburiyatlarini “juda yomon”, hatto “insofsiz” tarzda bajarmoqda. Tramp Hormuz bo‘g‘ozi orqali neft tashish jarayoni to‘liq ta’minlanmayotganini bildirib, bu holat dastlabki kelishuvga zid ekanini qayd etdi.
Shuningdek, u Eron tomonidan bo‘g‘ozdan o‘tuvchi tankerlar uchun to‘lov undirilayotgani haqidagi xabarlarga munosabat bildirib, agar bu ma’lumotlar rost bo‘lsa, Tehron zudlik bilan bunday amaliyotni to‘xtatishi lozimligini bildirdi.
8-aprelga o‘tar kechasi AQSH tomoni Eron bilan ikki haftalik sulh e’lon qilgan va Hormuz bo‘g‘ozining darhol ochilishi evaziga havo hujumlarini to‘xtatishga va’da bergan. Shu bilan birga, AQSH Eron tomonidan taqdim etilgan 10 banddan iborat taklifni ham qabul qilib olganini ma'lum qildi.
Ushbu taklifda Eron Hormuz bo‘g‘ozidan o‘tadigan kemalardan to‘lov undirilishi va mablag‘lar urushda vayron bo‘lgan joylarni tiklashga yo‘naltirilishini aytgan edi.
Shuningdek, Eron sulhga Livan ham kiritilishini talab qilgan. Lekin Isroil bosh vaziri Binyamin Netanyahu, otashkesim Livanga taalluqli emasligini bildirgan. AQSH va Eron sulhi e’lon qilingach Isroil qiruvchi samolyotlari Livan bo‘ylab 10 daqiqalik shiddatli havo hujumini amalga oshirdi.
Livan sog‘liqni saqlash vazirligi ma’lumotlariga ko‘ra, ushbu hujum oqibatida kamida 303 kishi halok bo‘ldi va 1150 kishi yaralandi.
Keyinchalik tomonlar bayonotlaridan kelib chiqib, sulh shartlari va muzokaralarni boshlash masalasida AQSH va Eron o‘rtasida jiddiy tafovutlar mavjudligi oydinlashdi. Hozircha Hormuz bo‘g‘ozi amalda yopiq bo‘lib qolmoqda, undan o‘tayotgan kemalar esa Eron bilan alohida kelishishga majbur bo‘lmoqda.
