Rossiya va Ukraina Pasxa munosabati bilan vaqtinchalik sulhga kelishdi
Ukraina Prezidenti ham Pasxa tahdidlarsiz nishonlanishi kerakligini bildirdi.
Rossiya Ukrainadagi urushda Pasxa bayrami munosabati bilan qisqa muddatli sulh joriy etishini ma’lum qildi. Bu haqda Kreml matbuot xizmati xabar berdi.
Ma’lum qilinishicha, Rossiya prezidenti Vladimir Putin qaroriga ko‘ra, sulh 11-aprel soat 16:00 dan boshlanib, 12-aprel kuni oxirigacha amal qiladi. Shu davr mobaynida barcha yo‘nalishlarda jang harakatlarini to‘xtatish bo‘yicha Rossiya Qurolli kuchlariga topshiriq berilgan.
Xususan, mudofaa vaziri Andrey Belousov va Bosh shtab boshlig‘i Valeriy Gerasimovga otishmani to‘liq to‘xtatish vazifasi yuklatilgan.
Kreml mazkur tashabbusga Ukraina tomonidan ham javob bo‘lishini kutayotganini ta’kidladi. Kiyev esa bu taklifga rozi bo‘ldi. Volodimir Zelenskiyning ta’kidlashicha, Pasxa bayrami “tahdidlarsiz” nishonlanishi kerak.
Shu bilan birga, Kreml matbuot kotibi Dmitriy Peskov ushbu sulh rejimi AQSH yoki Ukraina bilan oldindan kelishilmaganini bildirdi. Uning so‘zlariga ko‘ra, bu qaror muzokaralar jarayoni bilan bog‘liq emas va alohida tashabbus sifatida qabul qilingan.
Peskov, shuningdek, uch tomonlama muzokaralar ehtimoliga to‘xtalib, yaqin kelajakda AQSH diplomatlari Ukraina masalasiga ko‘proq e’tibor qaratishiga umid bildirdi. U bugungi kunda bunday imkoniyatlar Yaqin Sharqdagi vaziyat sabab cheklanganini ham qayd etdi.
