Samarqandda 1-sinf o‘quvchisiga hujum qilgan ayol sudga berildi

Samarqand viloyatida maktab o‘quvchilariga nisbatan zo‘ravonlik qilgan ayolga oid ish sudga yuborildi. Bu haqda “Zamon” informatsion dasturida xabar berildi.

 

Hodisa 3-aprel kuni Qo‘shrabot tumanidagi 53-umumta’lim maktabida sodir bo‘lgandi. Darsdan so‘ng uyga qaytayotgan 1-sinf o‘quvchilari o‘rtasida kelib chiqqan nizodan keyin, 6-aprel kuni janjalda jabrlangan bolaning 45 yoshli onasi maktabga kelgan.

 

Ayol sinf xonasida o‘quvchilar va ota-onalar oldida janjal ko‘targan hamda o‘g‘lini urgan deb gumon qilingan sinfdosh bolalarni urgan.

 

O‘qituvchining aytishicha, u voqea haqida xabar topgach, o‘quvchilarning ota-onalarini maktabga chaqirgan va ular bilan suhbat o‘tkazgan. Biroq keyinchalik sinfga kirganida ayol allaqachon u yerda bo‘lgan va o‘g‘lini qaysi bola urganini so‘ragach, janjal boshlanib ketgan.

 

Holat yuzasidan ayol o‘z harakatini izohlar ekan, hissiyotga berilib ketganini tan olib, qilgan ishidan pushaymon ekanini bildirgan.

“Kelgan vaqtimda urgan bolalarning onalari meni kulib qarshi oldi. Ularni ko‘rib mening jahlim chiqdi. ‘Ravshan kim?’ dedim. ‘Tur bolam’, dedi Ravshanning onasi. Men u bolalarni tanimayman ham. Jahlim chiqqandan ularni urib ketdim. Men onaman. O‘zimni bosolmasdan u bolajonlarni urib yubordim. Qilgan ishimdan afsusdaman. Bunday holat takrorlanmasligini xohlayman”, — degan u.

 

Mazkur voqea bo‘yicha Qo‘shrabot tumani ichki ishlar bo‘limi tomonidan uch nafar voyaga yetmagan o‘quvchilarning ota-onalariga nisbatan Ma’muriy javobgarlik to‘g‘risidagi kodeksning 47-moddasi asosida ma’muriy bayonnoma rasmiylashtirildi.

 

Shuningdek, bolalarni urgan ayolga nisbatan kodeksning 52-moddasi (yengil tan jarohati yetkazish) bo‘yicha ham ma’muriy bayonnoma tuzilib, ish qonuniy qaror qabul qilish uchun sud organlariga yuborildi.