Har qanday noto‘g‘ri harakat jiddiy oqibatlarga olib keladi — IRGC
Eron AQSh tahdidiga javoban keskin ogohlantirish bilan chiqdi.
Islom inqilobi qoʻriqchilari korpusi AQSh prezidenti Donald Tramp tomonidan ilgari surilgan Hormuz boʻgʻozini blokirovka qilish tahdidiga javob qaytardi.
IRGC matbuot xizmati bayonotiga koʻra, Eron qurolli kuchlari strategik suv yoʻlida yuz berayotgan barcha jarayonlarni doimiy ravishda nazorat qilib bormoqda. Ta’kidlanishicha, kemalar harakati zamonaviy texnologiyalar, jumladan, uchuvchisiz uchish apparatlari yordamida kuzatilmoqda.
“Barcha harakatlar va ularning yoʻqligi qurolli kuchlarimizning toʻliq nazorati ostida. Har qanday notoʻgʻri qadam dushmanni boʻgʻozning halokatli girdoblariga tortadi”, — deyiladi bayonotda.
Shuningdek, Eron tomoni oʻzining jangovar tayyorgarligini namoyish etish maqsadida Hormuz boʻgʻozi yaqinidagi hududda olingan dron tasvirlarini ham e’lon qilgan.
Avvalroq, ayrim manbalarda AQSh dengiz kuchlarining ikkita harbiy kemasi boʻgʻozdan oʻtishga uringan paytda keskin vaziyat yuzaga kelgani, zarba berish ehtimoli fonida ular ortga chekingani haqida xabarlar tarqalgan edi.
