AQSH Eron bo‘yicha harbiy ssenariylarni ko‘rib chiqmoqda
Shuningdek, Tramp masalani muzokara yo‘li bilan yechishni ham qo‘llab-quvvatlamoqda.
AQSh prezidenti Donald Tramp va uning maslahatchilari Eronga nisbatan ehtimoliy harbiy choralarni qayta ko‘rib chiqmoqda.
The Wall Street Journal xabariga ko‘ra, Pokistonda o‘tkazilgan AQSh–Eron muzokaralari natijasiz yakunlangach, Vashington bir qator ssenariylarni muhokama qilmoqda. Ular orasida Eron hududiga nisbatan cheklangan zarbalarni qayta boshlash ehtimoli ham bor.
Shuningdek, to‘liq ko‘lamli harbiy operatsiyalar varianti ham ko‘rib chiqilayotgani qayd etilgan. Biroq mutaxassislar bunday ssenariy mintaqada beqarorlikni kuchaytirishi va mojaroning yanada cho‘zilishiga olib kelishi mumkinligini ta’kidlamoqda.
Bundan tashqari, Hormuz bo‘g‘ozi orqali kemalar harakatini nazorat qilish maqsadida qisqa muddatli blokada joriy etish masalasi ham kun tartibida turibdi. Bu orqali yuk tashish xavfsizligini ta’minlash uchun ittifoqchilarga bosim o‘tkazish ehtimoli ham muhokama qilinmoqda.
Shu bilan birga, nashr manbalariga ko‘ra, Donald Tramp harbiy variantlar ko‘rib chiqilayotganiga qaramay, mojaroni diplomatik yo‘l bilan hal etish tarafdori bo‘lib qolmoqda.
