AQSh–Eron muzokaralarining yangi bosqichi 21-aprelgacha o'tkazilishi mumkin
Vositachilar muzokaralar sulh muddati tugashidan oldin o‘tkazilishini rejalashtirmoqda.
Yaqin Sharqdagi vositachi davlatlar — Misr, Pokiston va Turkiya — AQSh hamda Eron o‘rtasidagi muzokaralarning yangi bosqichini tashkil etishni rejalashtirmoqda.
Axios nashri xabariga ko‘ra, tomonlar o‘rtasida muloqotni davom ettirish va mavjud kelishmovchiliklarni bartaraf etish bo‘yicha sa’y-harakatlar kuchaytirilmoqda.
Manbalarga ko‘ra, navbatdagi muzokaralar yaqin kunlarda o‘tkazilishi kutilmoqda. Asosiy maqsad — amaldagi sulh bitimi muddati yakunlanadigan 21-aprelga qadar muhim masalalar yuzasidan kelishuvga erishishdir.
Ta’kidlanishicha, hozirgi vaziyat to‘liq boshi berk ko‘chaga kirib qolmagan. Muloqot eshigi ochiq qolmoqda va har ikki tomon ham muzokaralarni davom ettirishga tayyor ekanini namoyon etmoqda.
Eslatib o‘tamiz, avvalroq 11–12-aprel kunlari Islomobod shahrida o‘tkazilgan AQSh–Eron muzokaralari kelishuvsiz yakunlangan edi.
