Oq uy Eron bo‘yicha uchta ehtimoliy ssenariyni ko‘rib chiqmoqda — WP
Hokimiyat o‘zgarishi ssenariylardan biri sifatida muhokama qilinmoqda.
The Washington Post nashrining yozishicha, Oq uy Eron atrofidagi vaziyat rivoji uchun uchta asosiy ssenariyni ko‘rib chiqmoqda. Bu haqda nashr sharhlovchisi Devid Ignatius AQSh ma’muriyati rasmiylariga tayanib xabar bergan.
Ma’lum qilinishicha, birinchi ssenariy Eron hukumati ag‘darilishi bilan bog‘liq. Oq uy vakillarining fikricha, bu variant harbiy zarbalar to‘xtatilgan taqdirda nisbatan ehtimoliyroq hisoblanadi.
Ikkinchi ssenariy mamlakatda siyosiy yetakchilik almashinuvi yuz berishini nazarda tutadi. Xususan, yangi oliy rahbar sifatida Muhammad Bagir G'olibaf kabi amaldorlarning hokimiyat tepasiga kelishi ehtimoli tilga olingan.
Uchinchi ssenariy esa Islom inqilobi qo‘riqchilari korpusi tarkibidagi qattiqqo‘l kuchlar faollashuvi bilan bog‘liq. Unga ko‘ra, ular qarama-qarshilikni kuchaytirish, jumladan, Hormuz bo'g'ozidagi blokadani buzish yoki AQShni qo‘shimcha yon berishlarga majburlashga urinishi mumkin.
Ta’kidlanishicha, mintaqadagi vaziyat global energetika xavfsizligi bilan ham bog‘liq. Chunki aynan Hormuz bo‘g‘ozi orqali jahon neft va gaz ta’minotining muhim qismi amalga oshiriladi.
Avvalroq, Islomobodda bo‘lib o‘tgan AQSh–Eron muzokaralari kelishuvsiz yakunlanganidan so‘ng, Donald Tramp tomonidan bo‘g‘ozni blokirovka qilish bo‘yicha keskin bayonotlar yangragan edi.
