O‘simliklar karantini va himoyasi agentligi inspektori pora bilan ushlandi
U mineral o‘g‘itlarini “Navoiy” chegara bojxona posti orqali o‘tkazib berganligi evaziga pul talab qilgan.
O‘simliklar karantini va himoyasi agentligining Toshkent viloyati bo‘yicha boshqarmasi inspektori o‘z xizmat mavqeidan foydalanib, pora olayotganda qo‘lga olindi. Bu haqda DXX xabar berdi.
Ma’lum qilinishicha, inspektor Toshkent shahrida yashovchi fuqaroga tegishli 7 turdagi, jami 187 dona qadoqda bo‘lgan mineral o‘g‘it mahsulotlarini “Navoiy” chegara bojxona posti orqali o‘tkazib berganligi evaziga 20 million so‘m talab qilgan.
Inspektor so‘ralgan pul mablag‘ini poytaxtning Olmazor tumani hududida olgan vaqtida ashyoviy dalillar bilan ushlandi.
Holat yuzasidan unga nisbatan jinoyat ishi qo‘zg‘atilib, “qamoq” ehtiyot chorasi qo‘llanildi. Tergov harakatlari olib borilmoqda.
