Toqayev Qozog'istonga yetib borgach, Mirziyoyevga maktub yo'lladi

O‘zbekiston Prezidenti Shavkat Mirziyoyev nomiga Qozog‘iston Prezidenti Qasim-Jomart Toqayevdan maktub keldi. Bu haqda Prezident matbuot kotibi xabar berdi.

 

Maktubda Qozog‘iston yetakchisi nafaqat Markaziy Osiyo, balki butun jahon sivilizatsiyasi durdonasi bo‘lgan qadimiy Buxoro shahriga amaliy tashrifi chog‘ida ko‘rsatgan alohida mehmondo‘stlik va samimiyat uchun Shavkat Mirziyoyevga chin dildan minnatdorlik bildirgan.

 

Bundan tashqari, Toqayev O‘zbekiston bu bebaho boylikni asrab-avaylab, boyitib, buyuk o‘tmishni zamonaviy ehtiyojlar bilan uyg‘unlashtirib kelayotgani uni hayratga solganini qayd etgan. 

 

“Buxoroning bugungi go‘zal qiyofasi Sizning Yangi O‘zbekistonni barpo etishga qaratilgan oqilona va bunyodkorona siyosatingiz yuksak samaradorligining yaqqol ifodasidir. Puxta o‘ylangan tadbirlarga boy tashrifning o‘zi, shubhasiz, foydali bo‘ldi. Nazarimda, Buxorodagi bir kunlik muzokaralar uzoq muddatli siyosiy samarasi jihatidan rasmiy tashrifdan aslo qolishmaydi. Uchrashuvimiz Qozog‘iston va O‘zbekiston o‘rtasidagi ko‘p qirrali aloqalarni yanada mustahkamlash uchun yangi ufqlarni ochdi, davlatlararo strategik hamkorlikni yangi mazmun bilan boyitishga xizmat qiladi”, deyiladi maktubda.

 

Toqayev Ostonaga qaytgach, erishilgan va tasdiqlangan kelishuvlarni amalga oshirish, shuningdek, O‘zbekistonning turli sohalardagi foydali tajribasini hisobga olish bo‘yicha aniq topshiriqlar berganini, “Toza havo” qo‘shma tashabbusiga alohida e’tibor qaratishini ma’lum qilgan.

 

“Ishonchim komilki, biz qo‘ygan vazifalarning sifatli bajarilishi Qozog‘iston – O‘zbekiston strategik sherikligi va ittifoqchiligini yangi cho‘qqilarga olib chiqishga xizmat qiladi. Qozog‘iston uchun katta madaniy va tarixiy ahamiyatga ega bo‘lgan arxiv materiallarini taqdim etganingiz uchun alohida minnatdorchilik bildiraman. Bu harakat Sizning bag‘rikengligingiz va qozoq xalqiga bo‘lgan iliq munosabatingiz, qardosh mamlakatlarimiz tarixini munosib e’tirof etishingizdan dalolat beradi”, deya qayd etilgan maktubda.

 

Maktub so‘ngida Qozog‘iston prezidenti Shavkat Mirziyoyevga va oilasiga chin qalbidan sihat-salomatlik va baxt-saodat, Qozog‘istonning abadiy do‘sti, ittifoqchisi va strategik sherigi bo‘lgan Yangi O‘zbekistonni barpo etishda yangi muvaffaqiyatlar tilagan.