Turkiyadagi maktabda qurolli hujum oqibatida 4 kishi halok bo'ldi
Bu so‘nggi kunlarda mamlakatdagi ta’lim muassasasida sodir etilgan sodir etilgan ikkinchi qurolli hodisa hisoblanadi.
Turkiyaning Qahramonmarash shahrida joylashgan maktabda qurolli hujum sodir etildi.
Hodisa Onikisubat tumanidagi Ayser Chalik o‘rta maktabida yuz bergan. Viloyat gubernatori Mukerem Unluer ma’lumotiga ko‘ra, otishma oqibatida 4 kishi — bir o‘qituvchi va uch o‘quvchi halok bo‘lgan, 20 kishi esa turli darajada jarohat olgan. Yaralanganlarning to‘rt nafari og‘ir ahvolda.
Dastlabki ma’lumotlarga ko‘ra, hujumni mazkur maktabning 8-sinf o‘quvchisi sodir etgan. U bir vaqtning o‘zida ikki sinfxonaga bostirib kirib, o‘qotar qurollardan foydalangan. O‘smirning yonida bir nechta qurol va o‘q-dorilar bo‘lgani aniqlangan.
Hujumchining taqdiri yuzasidan hozircha qarama-qarshi ma’lumotlar mavjud: ayrim manbalarda uning qo‘lga olingani, boshqalarida esa o‘z joniga qasd qilgani aytilmoqda. Rasmiy idoralar yakuniy xulosani e’lon qilmagan.
Voqea mahalliy vaqt bilan taxminan soat 13:30 da sodir bo‘lgan. Hodisa joyida sud-tibbiyot ekspertlari va psixologlar ish olib bormoqda. Mutasaddilar hujum motivlari va qurolga egalik qilish holatlarini o‘rganmoqda.
Qayd etilishicha, bu so‘nggi kunlarda Turkiyadagi ta’lim muassasalarida sodir etilgan ikkinchi qurolli hodisa hisoblanadi. Avvalroq Siverek shahridagi maktabda ham o‘smir tomonidan qurolli hujum uyushtirilib, kamida 16 kishi jarohat olgan edi.
