Chirchiqda ona-bolani urib yuborishiga oz qolgan haydovchi “pravasi”dan mahrum bo‘ldi
Shuningdek, haydovchiga 10 million 300 ming so‘m miqdorida jarima jazosi tayinlandi.
Toshkent viloyati, Chirchiq shahrida yo‘l harakati qoidalarini qo‘pol ravishda buzgan haydovchiga nisbatan sud hukmi chiqarildi. Bu haqda YHXB matbuot xizmati ma’lum qildi.
12-aprel kuni ijtimoiy tarmoqlarda Cobalt rusumli avtomobil haydovchisi svetoforning taqiqlovchi ishorasiga amal qilmasdan, tezlikni kamaytirmagan holda tartibga solingan piyodalar o‘tish joyidan o‘tayotgan ona va bolani urib yuborishiga oz qolgan holat aks etgan video tarqalgandi.
Ma’lum qilinishicha, o‘tkazilgan qidiruv va surishtiruv ishlari davomida ushbu qoidabuzarlikni 33 yoshli, taksichilik faoliyati bilan shug‘ullanuvchi haydovchi sodir etgani aniqlangan. Haydovchining bildirishicha, voqea sodir bo‘lgan vaqtda u isitmasi ko‘tarilgan 5 yoshli farzandini olib ketayotgan bo‘lgan va piyodalarni payqamay qolgan.
Mazkur holat piyodalar hayotiga tahdid sifatida baholanib, haydovchiga nisbatan Ma’muriy javobgarlik to‘g‘risidagi kodeksning 128-10-moddasi (yo‘l bezoriligi) asosida ma’muriy bayonnoma rasmiylashtirilgan.
14-aprel kuni bo‘lib o‘tgan sud qaroriga ko‘ra, haydovchi aybli deb topilib, unga nisbatan transport vositalarini boshqarish huquqidan 2 yil muddatga mahrum etish hamda bazaviy hisoblash miqdorining 25 baravari — 10 million 300 ming so‘m miqdorida jarima jazosi tayinlandi.
