Surxondaryoda mansabdor pora bilan ushlandi
U bo‘shaydigan bino va yer maydonini auksion orqali sotib olib berish uchun pul talab qilgan.
Surxondaryo viloyatida mansabdor shaxsga nisbatan jinoyat ishi qo‘zg‘atildi. Bu haqda DXX xabar berdi.
Ma’lum qilinishicha, Termiz shahar Veterinariya va chorvachilikni rivojlantirish bo‘limi xodimi xizmat mavqeidan foydalanib, fuqaroning ishonchiga kirgan. U bo‘lim yaqin vaqtda boshqa joyga ko‘chishini aytib, bo‘shaydigan bino va yer maydonini tanishlari orqali auksionda sotib olib berish evaziga mansabdor shaxs fuqarodan 3000 AQSH dollari talab qilgan.
Davlat xavfsizlik xizmati, Iqtisodiy jinoyatlarga qarshi kurashish departamenti hamda ichki ishlar organlari xodimlari tomonidan o‘tkazilgan tezkor tadbirda u 2 ming AQSH dollari va 12 million so‘m pul mablag‘ini olayotgan vaqtida ashyoviy dalillar bilan ushlangan.
Hozirda mazkur holat yuzasidan jinoyat ishi qo‘zg‘atilib, tergov harakatlari davom etmoqda.
