Turkiyada maktabdagi otishmalarda halok bo‘lganlar soni 9 nafarga yetdi

Turkiyada Shanliurfa va Qahramonmarashda yuz bergan maktabdagi otishmalar yuzasidan keng ko‘lamli tergov harakatlari olib borilmoqda. Bu haqda Anadolu axborot agentligi xabar berdi.

 

Turkiya Ichki ishlar vazirining ma’lum qilishicha, Qahramonmarashdagi hodisa oqibatida 9 kishi halok bo‘lgan, ularning 8 nafari o‘quvchi, biri o‘qituvchi. Yana 13 kishi tan jarohati olgan bo‘lib, 6 nafari reanimatsiyada, 3 nafarining ahvoli og‘ir deb baholanmoqda. Dastlab 4 kishi halok bo'lgani haqida xabar berilgandi.

 

Rasmiy bayonotga ko‘ra, jinoyatni targ‘ib qiluvchi va jamoat tartibiga salbiy ta’sir ko‘rsatishga qaratilgan materiallarni tarqatgan 83 nafar shaxsga nisbatan qo‘lga olish qarori chiqarilgan hamda ularga nisbatan tegishli huquqiy choralar ko‘rilgan. Shuningdek, 940 ta ijtimoiy tarmoq akkauntiga kirish cheklovi joriy etilib, 93 ta Telegram guruhi yopilgan.

 

Qahramonmarashdagi qurolli hujum yuzasidan olib borilgan tergov doirasida hujumni sodir etgan shaxs — Isa Aras Mersinlining otasi Ugur Mersinli hibsga olingani ma’lum qilindi. Dastlabki o‘rganishlarda gumonlanuvchining WhatsApp profilida 2014-yilda AQShda hujum sodir etgan Elyot Rojerga ishora qiluvchi tasvirdan foydalangani aniqlangan.

 

Shanliurfaning Siverek tumanida sodir bo‘lgan yana bir maktab hujumi yuzasidan esa qo‘lga olinganlar soni 18 nafarga yetdi. Tergov davomida tahdidli izohlar qoldirgan hamda yolg‘on ma’lumotlarni ochiq tarqatgan shaxslar ham aniqlanib, ushlangan. Ushbu otishmada hujum qilgan shaxs o'z joniga qasd qilgan hamda 16 kishi yaralangandi.

 

Hodisa yuzasidan keng qamrovli tergov ishlari olib borilmoqda. Ichki ishlar vazirligi tomonidan 4 nafar ma’muriy va 4 nafar politsiya bosh inspektori jalb etilgan. Adliya vazirligi 3 nafar bosh prokuror o‘rinbosari hamda 4 nafar prokurorni ishga safarbar qilgan. 

 

Shuningdek, Milliy ta’lim vazirligi tomonidan ham alohida tekshiruvlar boshlangan.