Туркиядаги мактабда қуролли ҳужум оқибатида 4 киши ҳалок бўлди
Бу сўнгги кунларда мамлакатдаги таълим муассасасида содир этилган содир этилган иккинчи қуролли ҳодиса ҳисобланади.
Туркиянинг Қаҳрамонмараш шаҳрида жойлашган мактабда қуролли ҳужум содир этилди.
Ҳодиса Оникисубат туманидаги Айсер Чалик ўрта мактабида юз берган. Вилоят губернатори Мукерем Унлуэр маълумотига кўра, отишма оқибатида 4 киши — бир ўқитувчи ва уч ўқувчи ҳалок бўлган, 20 киши эса турли даражада жароҳат олган. Яраланганларнинг тўрт нафари оғир аҳволда.
Дастлабки маълумотларга кўра, ҳужумни мазкур мактабнинг 8-синф ўқувчиси содир этган. У бир вақтнинг ўзида икки синфхонага бостириб кириб, ўқотар қуроллардан фойдаланган. Ўсмирнинг ёнида бир нечта қурол ва ўқ-дорилар бўлгани аниқланган.
Ҳужумчининг тақдири юзасидан ҳозирча қарама-қарши маълумотлар мавжуд: айрим манбаларда унинг қўлга олингани, бошқаларида эса ўз жонига қасд қилгани айтилмоқда. Расмий идоралар якуний хулосани эълон қилмаган.
Воқеа маҳаллий вақт билан тахминан соат 13:30 да содир бўлган. Ҳодиса жойида суд-тиббиёт экспертлари ва психологлар иш олиб бормоқда. Мутасаддилар ҳужум мотивлари ва қуролга эгалик қилиш ҳолатларини ўрганмоқда.
Қайд этилишича, бу сўнгги кунларда Туркиядаги таълим муассасаларида содир этилган иккинчи қуролли ҳодиса ҳисобланади. Аввалроқ Сиверек шаҳридаги мактабда ҳам ўсмир томонидан қуролли ҳужум уюштирилиб, камида 16 киши жароҳат олган эди.
