Javohir Sindarov “Mehnat shuhrati” ordeni bilan mukofotlandi
O‘zbekistonlik grossmeyster Kiprda o‘tgan Nomzodlar turnirida rekord natijalar qayd etib, muddatidan oldin chempionlikni qo‘lga kiritgan edi.
O‘zbekiston Prezidenti Shavkat Mirziyoyevning Farmoniga muvofiq, shaxmat bo‘yicha O‘zbekiston milliy terma jamoasi a’zosi Sindarov Javohir Sanjarbekovich “Mehnat shuhrati” ordeni bilan mukofotlandi.
Mazkur yuksak mukofot sportchining Yangi O‘zbekiston nufuzini xalqaro maydonda yuksaltirishga qo‘shgan ulkan hissasi, mamlakatimizda shaxmat sportini keng ommalashtirish, ayniqsa, yoshlar orasida ushbu intellektual sport turini targ‘ib etish yo‘lidagi xizmatlari uchun topshirildi.
Shuningdek, Javohir Sindarov Kiprda o‘tkazilgan Xalqaro shaxmat federatsiyasi Nomzodlar turnirida yuksak intellektual salohiyati va professional mahoratini namoyon etib, dunyoning eng kuchli grossmeysterlari orasida rekord natijalar qayd etgani hamda muddatidan oldin g‘oliblikni qo‘lga kiritgani alohida e’tirof etildi.
Farmonda yosh avlod qalbida milliy g‘urur, Vatanga muhabbat va sadoqat tuyg‘ularini kamol toptirish borasidagi ibratli xizmatlari ham qayd etilgan.
