Jizzaxda FVB mansabdori pora bilan ushlandi
U yong'in xavfsizligi talablarini buzgan muassasa rahbaridan ishni sudga oshirmaslik uchun pul talab qilgan.
Jizzax viloyatida Favqulodda vaziyatlar bo‘limi mansabdori pora olishda qo‘lga olindi. Bu haqda DXX xabar berdi.
Ma’lum qilinishicha, Mirzacho‘l tumani Favqulodda vaziyatlar bo‘limi boshlig‘i o‘rinbosari tuman markazidagi umumiy ovqatlanish maskanida o‘tkazilgan tekshiruv davomida aniqlangan yong‘in xavfsizligi talablari buzilishi yuzasidan ma’muriy bayonnoma rasmiylashtirgan.
U mansab mavqeidan foydalanib, maskanni yopib qo‘ymaslik va to‘plangan hujjatlarni sudga yubormaslik evaziga muassasa rahbaridan 3 million so‘m pul talab qilgan.
Davlat xavfsizlik xizmati hamda Bosh prokuratura huzuridagi Departament xodimlari tomonidan o‘tkazilgan tezkor tadbirda mansabdor shaxs so‘ralgan pulni olayotgan vaqtida ashyoviy dalillar bilan ushlangan.
Holat yuzasidan jinoyat ishi qo‘zg‘atilib, hozirda tergov harakatlari olib borilmoqda.
