Janubiy Sudanda 7,5 million kishi oziq-ovqat yordamiga muhtoj
BMT Janubiy Sudandagi keskinlashayotgan vaziyatdan jiddiy xavotir bildirdi.
Birlashgan Millatlar Tashkiloti Janubiy Sudandagi xavfsizlik va gumanitar vaziyat tobora yomonlashib borayotganidan jiddiy xavotir bildirdi. Bu haqda BMT Xavfsizlik Kengashida mamlakatdagi holat yuzasidan o‘tkazilgan yig‘ilishda ma’lum qilindi deydi TASS.
Janubiy Sudandagi BMT missiyasi rahbari Anita Kiki Gbeho so‘zlariga ko‘ra, mamlakatda xavfsizlik holati o‘ta tashvishli bo‘lib qolmoqda. U 2025-yilda halok bo‘lganlar va jarohatlanganlar soni 2024-yilga nisbatan 40 foizga oshganini qayd etgan.
BMT Bosh kotibining gumanitar masalalar bo‘yicha o‘rinbosari esa ommaviy ko‘chishlar, oziq-ovqat tanqisligi hamda tibbiy yordam yetishmovchiligi kuchayganini bildirgan.
Uning ma’lumotiga ko‘ra, 2025-yil dekabridan buyon qariyb 250 ming kishi o‘z uyini tark etishga majbur bo‘lgan. Faqat Jonglei shtatining o‘zida 1,35 million fuqaro tibbiy xizmatdan mahrum bo‘lgan.
Shuningdek, BMT hisob-kitoblariga ko‘ra, joriy yilda 7,5 milliondan ortiq aholi oziq-ovqat yordamiga muhtoj bo‘ladi.
Janubiy Sudandagi vaziyat o‘tgan yildan buyon hukumat kuchlari va qurolli muxolifat o‘rtasidagi to‘qnashuvlar sabab yanada murakkablashgan.
