Tramp AQSh va Eron o‘rtasida yangi muzokaralar bo‘lishini e’lon qildi
AQSh vakillari dushanba kuni Islomobodga borib, Eron bilan uchrashuv o‘tkazadi.
AQSh prezidenti Donald Tramp Vashington vakillari Eron bilan navbatdagi muzokaralarni o‘tkazish uchun Pokiston poytaxti Islomobodga yo‘l olishini ma’lum qildi.
Prezident bu haqda o‘zining Truth Social ijtimoiy tarmog‘idagi sahifasida bayonot bergan.
Trampning ta’kidlashicha, AQSh muzokarachilari dushanba kuni Islomobodga yetib boradi va Eron bilan mavjud keskinlik hamda mojaroning yechimiga doir muzokaralarni boshlashi rejalashtirilgan.
“Mening vakillarim Islomobodga yo‘l olishmoqda. Ular ertaga kechqurun muzokaralar uchun u yerga kelishadi”, — deb yozgan AQSh prezidenti.
Hozircha Tramp delegatsiya tarkibiga kimlar kirishi, shuningdek, muzokaralarda qaysi masalalar muhokama qilinishi yuzasidan batafsil ma’lumot bermagan.
Mazkur uchrashuv AQSh va Eron o‘rtasidagi munosabatlarda navbatdagi diplomatik bosqich sifatida baholanmoqda.
