Boltiqbo‘yi davlatlari Moskvadagi paradga boradigan Slovakiya yetakchisiga o‘z havo hududini yopdi
Robert Fitso 9-may paradida qatnashish uchun boshqa parvoz yo‘nalishini topishini aytdi.
Estoniya, Latviya va Litva Slovakiya bosh vaziri Robert Fitsoning 9-may kuni Moskvada o‘tkaziladigan paradga parvozi uchun o‘z havo hududidan foydalanishiga ruxsat bermadi.
Bu haqda Estoniya tashqi ishlar vaziri Margus Saxkna ma’lum qilib, Estoniya bunday qarorni ilgari ham qabul qilganini va bu yil ham o‘z pozitsiyasini o‘zgartirmasligini bildirdi.
“Rossiyani ulug‘lashga qaratilgan tadbirga uchish uchun Estoniya havo hududidan foydalanishga ruxsat berilmaydi. Bu tamoyil o‘tgan yili ham amal qilgan va hozir ham o‘z kuchida qoladi”, — deyiladi bayonotda.
TIVga ko‘ra, Estoniya rasmiy parvozlar uchun ruxsat berishda Yevropa Ittifoqi va NATO qoidalariga amal qiladi, biroq Rossiyaga safarlar bundan mustasno hisoblanadi.
Avvalroq Robert Fitso Litva va Latviya ham uning samolyoti uchun havo hududini yopishini ma’lum qilgan edi. U bu qarorga qaramay, Moskvaga yetib borish uchun muqobil yo‘nalish topishini bildirgan.
“Yevropa Ittifoqiga a’zo davlatlar boshqa bir a’zo davlat bosh vazirining o‘z hududi ustidan uchib o‘tishiga yo‘l qo‘ymayapti. Shunga qaramay, men boshqa yo‘l topaman”, — degan Slovakiya bosh vaziri.
Ma’lumot uchun, 2025-yilda Moskvada o‘tgan 9-may paradida 27 davlat yetakchisi, jumladan Xitoy, Belarus, Kuba, Venesuela, Slovakiya va Serbiya rahbarlari ishtirok etgan. O‘shanda ham Boltiqbo‘yi davlatlari Robert Fitso va Serbiya prezidenti Aleksandar Vyuchich samolyotlarining o‘z hududidan o‘tishiga ruxsat bermagan.
