Eron AQSH bilan navbatdagi muzokaralarda qatnashishni rad etdi
Shuningdek, AQSh vitse-prezidenti boshchiligidagi delegatsiya Eron bilan muzokaralarning yangi bosqichini o‘tkazish uchun Islomobodga yo‘l olmoqda.
AQSh vitse-prezidenti Jey Di Vance boshchiligidagi delegatsiya Eron bilan muzokaralarning yangi bosqichini o‘tkazish uchun Islomobodga yo‘l olmoqda.
AQSh prezidenti Donald Trampga ko‘ra, AQSh vakillari dushanba kuni kechqurun Pokiston poytaxtiga yetib boradi. Oq uy delegatsiya tarkibiga Tramp maslahatchilari Stiv Uitkoff va Jared Kushner ham kiritilganini bildirgan. Ular avvalgi muzokaralarda ham ishtirok etgan.
Biroq Eron tomoni muzokaralarning navbatdagi bosqichida qatnashishini hozircha tasdiqlamagan. Tasnim agentligi xabariga ko‘ra, Hormuz bo‘g‘ozida AQSh tomonidan joriy etilgan dengiz blokadasi saqlanib qolayotgan bir paytda Tehron delegatsiya yubormaydi.
Agentlik ma’lumotiga ko‘ra, Islomobodda o‘tgan dastlabki muzokaralardan so‘ng tomonlar Pokiston vositachisi orqali muloqotni davom ettirgan, biroq jarayon “AQShning ortiqcha talablari va ambitsiyalari” sabab natijasiz yakunlangan.
Eronning yana bir davlat agentligi — IRNA esa Islomobodda ikkinchi bosqich muzokaralari o‘tkazilishi haqidagi xabarlarni rad etdi. Agentlik AQSh tarqatayotgan ma’lumotlarni “media o‘yini” deb atab, ularni haqiqatga to‘g‘ri kelmasligini bildirdi.
Shu bilan birga, IRNA muzokaralarga to‘sqinlik qilayotgan asosiy omillar sifatida AQShning “haddan tashqari talablari”, “noreal kutishlari”, Vashingtonning “tez-tez o‘zgaruvchi pozitsiyasi”, qarama-qarshi bayonotlari hamda tahdidlarini ko‘rsatgan.
Avvalroq Donald Trump Eronni “adolatli va oqilona bitim”ni qabul qilishga chaqirib, aks holda AQSh yana zarbalar berishi mumkinligini bildirgan edi.
Axios nashrining yozishicha, Tehronda AQShning muzokaralar haqidagi bayonotlari ehtimoliy harbiy harakatlar uchun niqob bo‘lishi mumkinligidan xavotir mavjud.
Ma’lumot uchun, muzokaralarning birinchi bosqichi 11–12-aprel kunlari bo‘lib o‘tgan va tomonlar kelishuvga erisha olmagan. Aprel boshida kelishilgan ikki haftalik sulh muddati esa 21-aprel kuni yakuniga yetadi. Lekin Bloomberg manbalari sulh uzaytirilishi mumkinligini ham ma’lum qilgandi.
