Prezident Shavkat Mirziyoyev Rossiya delegatsiyasini qabul qildi
“INNOPROM” ko‘rgazmasi doirasida O‘zbekiston va Rossiya o‘rtasidagi hamkorlikni rivojlantirish, yangi texnologik va sanoat loyihalarini amalga oshirish bo‘yicha muzokaralar o‘tkazildi.
O‘zbekiston Prezidenti Shavkat Mirziyoyev 20-aprel kuni Toshkent shahrida bo‘lib o‘tayotgan “INNOPROM. Markaziy Osiyo” xalqaro sanoat ko‘rgazmasi doirasida Rossiya Federatsiyasi Hukumati Raisining birinchi o‘rinbosari Denis Manturov boshchiligidagi Rossiya delegatsiyasini qabul qildi.
Uchrashuvda Tatariston, Boshqirdiston respublikalari, shuningdek Leningrad, Kirov, Irkutsk va Omsk viloyatlari hamda Rossiyaning yirik sanoat kompaniyalari rahbarlari ishtirok etdi.
Suhbat avvalida Denis Manturov Rossiya Federatsiyasi Prezidenti Vladimir Putinning samimiy salomi va ezgu tilaklarini O‘zbekiston Prezidentiga yetkazdi.
O‘zbekiston Prezidenti 35 dan ortiq davlatdan 10 mingdan ziyod biznes vakillari ishtirok etayotgan “INNOPROM” xalqaro ko‘rgazmasi muvaffaqiyatli tashkil etilganini alohida ta’kidladi.
Uchrashuvda O‘zbekiston va Rossiya o‘rtasidagi savdo-iqtisodiy hamkorlikni yanada kengaytirish, erishilgan kelishuvlarni amaliyotga tatbiq etish masalalari muhokama qilindi.
Tomonlar savdo aylanmasining barqaror o‘sib borayotgani, sanoat, energetika, transport, metallurgiya, kimyo, tinch atom va boshqa muhim sohalardagi qo‘shma loyihalar muvaffaqiyatli amalga oshirilayotganini mamnuniyat bilan qayd etdilar.
Shuningdek, sanoat kooperatsiyasini rivojlantirish, hududlararo aloqalarni kuchaytirish va tadbirkorlar o‘rtasidagi hamkorlikni kengaytirish masalalariga alohida e’tibor qaratildi.
Qishloq xo‘jaligi mashinasozligi, energiya samaradorligi, suv xo‘jaligi, kiberxavfsizlik va sun’iy intellekt kabi istiqbolli yo‘nalishlarda yangi loyihalarni amalga oshirish bo‘yicha kelishuvlar qo‘llab-quvvatlandi.
Bundan tashqari, texnik oliygohlar negizida iqtisodiyotning ustuvor tarmoqlari uchun muhandis kadrlar tayyorlash tizimini rivojlantirish masalasi ham muhokama qilindi.
Uchrashuv yakunida Rossiya hududlari va yirik kompaniyalari vakillari tomonidan O‘zbekistonda yangi investitsiya va sanoat loyihalarini amalga oshirish bo‘yicha aniq takliflar taqdim etildi.
