Armanistonda salkam 10 tonna Nestle mahsuloti qaytarib olindi
Kompaniyaga ko‘ra, bu ehtiyot chorasi sifatida amalga oshirilgan.
Armanistonda NAN brendi ostidagi Nestle bolalar ovqatining 9,7 tonnasi xavfli deb topilib, yo‘q qilindi. Bu haqda respublika Oziq-ovqat xavfsizligi inspeksiyasiga tayanib, “News” nashri xabar berdi.
Nestle kompaniyasining ma’lum qilishicha, ayni paytda Armaniston Respublikasida bolalar aralashmalarining ayrim partiyalarini ixtiyoriy ravishda qaytarib olish bo‘yicha tadbirlarni yakunlangan.
“Bu jarayon kompaniya tomonidan ehtiyot chorasi sifatida amalga oshirilgan. Qaytarib olingan mahsulotni yo‘q qilish — bu tegishli bozorlarda regulyator bilan hamkorlikda amalga oshiriladigan standart yakuniy jarayonlardan biri bo‘lib, u hech qanday qo‘shimcha laboratoriya tahlillari o‘tkazilishi bilan bog‘liq emas”, deyiladi rasmiy xabarda.
Avvalroq, 2026 yil yanvar oyida Nestle Rossiyada bolalar uchun mo‘ljallangan ayrim quruq sut va davolovchi aralashmalar partiyasini ixtiyoriy ravishda bozordan qaytarib olgan edi. Bu qaror tashqi yetkazib beruvchidan kelgan xomashyoda ham sereulid toksini bo‘lishi ehtimoli bilan izohlangan.
Kompaniya ma’lumotiga ko‘ra, mazkur komponent miqdori juda kam bo‘lib, xavf ehtimoliy xarakterga ega. Mahsulotni qaytarib olish esa global xavflarni kamaytirish siyosati doirasida amalga oshirilgan.
Shuningdek, “HiPP” bolalar ozuqasidan ham kalamush zahari topilgandi. Zahar shikastlangan qadoqlardan aniqlangani aytilgan. Mazkur ozuqani ishlab chiqaruvchisi bu holat tovlamachilik ekanini bildirgan.
