Bolgariya va Isroilga ishga yuborish bilan bog‘liq noqonuniy holatlar aniqlandi
Fuqarolardan Bolgariyaga yuborish uchun 3 ming dollar, Isroilga yuborish uchun 20 ming dollar so‘ralgan.
Navoiy va Qashqadaryo viloyatlarida chet elga ishga yuborishni va’da qilib, fuqarolarni aldagan shaxslar qo‘lga olindi. Bu haqda DXX ma’lum qildi.
Qayd etilishicha, Navoiy shahrida faoliyat yurituvchi sayyohlik firmasi rahbari Xatirchi tumanida yashovchi 2006-yilda tug‘ilgan fuqaroning ishonchiga kirib, uni Bolgariyaga ishga jo‘natish uchun barcha hujjatlarni tayyorlab berishini aytgan. U xizmatlari evaziga 3 ming AQSH dollari olgan vaqtida ashyoviy dalillar bilan ushlangan.
Shuningdek, Qashqadaryo viloyatining Kitob tumanida ham shu kabi holat aniqlangan. Toshkent viloyatida yashovchi 1997-yilda tug‘ilgan shaxs ikki nafar fuqaroni Isroilga ishga yuborish va ishchi vizasini tanishlari orqali rasmiylashtirib berishni va’da qilgan. U bu xizmatlar uchun 20 ming AQSH dollari talab qilgan. Tezkor tadbir davomida u so‘ralgan mablag‘ning 5 ming AQSH dollarini olgan vaqtida qo‘lga olingan.
Har ikki holat yuzasidan jinoyat ishlari qo‘zg‘atilib, hozirda tergov harakatlari olib borilmoqda.
Mutasaddilar fuqarolarni chet elga ishga jo‘natish bo‘yicha ijtimoiy tarmoqlarda tarqalayotgan takliflarga nisbatan ehtiyotkor bo‘lishga chaqirdi. Shuningdek, faqat Vazirlar Mahkamasi huzuridagi Migratsiya agentligi yoki tegishli litsenziyaga ega xususiy bandlik agentliklari orqali murojaat qilish tavsiya etilmoqda.
