Hormuz bo‘g‘ozini minalardan tozalashga olti oy ketadi — Pentagon
Bo‘g‘ozdagi ko‘plab minalar koordinatalari qayd etilmasdan o‘rnatilgani aytilgan edi.
Pentagon AQSh qonun chiqaruvchilariga Hormuz bo‘g‘ozini minalardan tozalash ishlari taxminan olti oy davom etishi mumkinligini ma’lum qildi. Bu haqda Associated Press agentligi xabar berdi.
Qayd etilishicha, mazkur ma’lumot AQSh Vakillar palatasining qurolli kuchlar qo‘mitasida seshanba kuni o‘tkazilgan yopiq brifing chog‘ida taqdim etilgan.
Manba so‘zlariga ko‘ra, yig‘ilish davomida qonunchilar Eronga qarshi harbiy harakatlar narxi, strategiyasi va maqsadlari yuzasidan ko‘plab savollarni o‘rtaga tashlagan. Biroq, muhokamalar ko‘proq aniqlik kiritish o‘rniga yangi savollarni yuzaga keltirgan.
Shuningdek, kongress a’zolari urushning dastlabki bosqichida Eronning Minab shahridagi maktab majmuasiga berilgan zarba bo‘yicha ham hozirga qadar aniq javob berilmaganini ham ko‘targan.
Avvalroq Eron Hormuz bo‘g‘ozida o‘rnatilgan minalarni aniqlash va zararsizlantirishdagi qiyinchiliklar sabab dengiz yo‘lini to‘liq ocholmayotgani haqida xabar berilgandi.
Bo‘g‘ozdagi ko‘plab minalar tartibsiz ravishda va koordinatalari qayd etilmasdan o‘rnatilgani, ayrim portlovchi qurilmalar esa ataylab erkin suzishga qo‘yib yuborilgani bildirilgandi.
