Namanganda 22 ming dollar pora olgan qurilish sohasi xodimlari ushlandi
Ular noturar binoning loyiha hujjatlarini ijobiy hal qilib berish uchun tadbirkordan pul talab qilgan.
Namangan viloyatida qurilish sohasiga oid korrupsion holat aniqlandi. Bu haqda DXX xabar berdi.
Ma’lum qilinishicha, viloyat Qurilish va uy-joy kommunal xo‘jaligi bosh boshqarmasining ikki nafar bosh mutaxassisi mahalliy tadbirkordan pora talab qilgan.
Ular Yangi Namangan tumanida joylashgan, tadbirkorga tegishli bo‘lgan ikki qavatli noturar bino uchun qurilish ruxsatnomasi, arxitektura-rejalashtirish topshirig‘i hamda loyiha hujjatlarini ijobiy hal qilib berish evaziga 22 ming AQSH dollari talab qilgan. Joriy yil mart oyida esa ushbu mablag‘ning 7 ming dollari olgan.
Davlat xavfsizlik xizmati xodimlari tomonidan Bosh prokuratura huzuridagi Departament bilan hamkorlikda o‘tkazilgan tezkor tadbir davomida gumonlanuvchilardan biri qolgan 15 ming AQSH dollarini olayotgan vaqtida ashyoviy dalillar bilan ushlandi. Shuningdek, ikkinchi shaxs ham protsessual tartibda qo‘lga olingan.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
