Farg'onada fuqaro IIO xodimlari sababli vafot etdimi?
Ijtimoiy tarmoqlarda tarqalayotgan xabarlarga oydinlik kiritildi.
Ijtimoiy tarmoqlarida So‘x tumani Lembur MFYda yashovchi 1966-yilda tug‘ilgan fuqaro IIO xodimlari sababli vafot etgani haqida xabarlar tarqaldi. Ushbu holat bo‘yicha Farg‘ona IIB rasmiy axborot berib, tarqalgan xabarlar haqiqatga to‘g‘ri kelmasligini bildirdi.
Ma’lum bo‘lishicha, fuqaro M.H. joriy yilning 8-aprel kuni jamoat joyida spirtli ichimlik ichgani va mast holatda MTM da ayollar bilan janjallashib, jamoat tartibini buzgani uchun MJtKning 187-moddasi bilan profilaktika inspektori tomonidan ma’muriy bayonnoma rasmiylashtirilgan.
Ertasi kuni 9-aprelda fuqaro jarima to‘lashi kerakligidan xabar topib, mast holatda bo‘la turib, profilaktika inspektori bilan tortishgani va uyiga yuborilgan holati kuzatuv kamerasida saqlanib qolgan.
Xabarga ko‘ra, ushbu fuqaro so‘ngi 8-10 kun davomida ovqat yemasdan faqat spirtli ichimlik iste’mol qilganligi sababli salomatligi yomonlashib, 11-aprel kuni tibbiyot muassasasining jonlantirish bo‘limiga yotqizilgan. Ko‘rsatilgan muolajalarga qaramasdan 13-aprel kuni shifoxonada vafot etgan.
Tibbiyot muassasasining dastlabki xulosasida bemorning o‘limiga surunkali spirtli ichimlik iste’mol qilish va alkogoldan kuchli zaharlanish sabab bo‘lgani ko‘rsatilgan.
Hozirda holat yuzasidan prokuratura organlari tomonidan tergovga qadar tekshiruv harakatlari olib borilmoqda.
